Countryside Rural Bank pasidunggan sa hunta probinsyal

CEBU - Gipsidunggan sa mga sakop sa hunta probinsyal sa Sugbu ang kadagkoan ug tagdumala sa Philippine Countryside Rural Bank gumikan sa programa niini pagtabang sa mga kabus nga molupyo sa lungsod sa Liloan ug ingon man sa dakbayan sa Lapulapu nga makapadayon sa pagtungha sa kurso nga dali ra usab sila makatrabaho.

Si Bokal Victor Maambong ingon man si Bokal Agnes Magpale maoy miduso sa resolusyon nga naghatag sa pasidungog sa Philippine Countryside Rural Bank.

Si Bise Gobernador Gregorio Sanchez, Jr. ug mga sakop sa hunta probinsyal mipaluyo sa giduso nga resolusyon nila ni Maambong ug Magpale. Nakita nila nga usa kini sa mga maayong programa nga gipatuman sa bangko.

Usa sa programa sa PCRB mao ang pagtabang niadtong mga kabus nga molupyo sa lungsod sa Liloan nga gumikan sa kakabus dili na makapadayon sa ilang pagtungha.

Daghan na ang migradwar gumikan sa programa sa PCRB nga molupyo sa lungsod sa Liloan. Gani pipila niini nakatrabaho sa mao ra usab nga bangko.

Si Mayor Vincent Franco “Duke” Frasco sa lungsod sa Liloan usa usab sa mipadayag og pagdayeg sa programa sa PCRB.

Gawas sa lungsod sa Liloan, ang PCRB nagpatuman usab karon og programa kabahin sa edukasyon sa barangay Maribago sa dakbayan sa Lapulapu.

Gani ang mga batan-on nga wala na makapadayon sa pagtungha gipaubos sa pagbansaybansay kabahin sa gimbuhaton sa mga hotel ingon man beach resort.

 Mga opisyal sa barangay Maribago mihimo og pakig-alayon sa kadagkuan sa Technical Education and Skills Development Authority kon TESDA alang sa maong programa.

Si Kapitan Joseph Pangatungan sa barangay Maribago miingon nga ang pagtabang sa PCRB gikalipay nila pag-ayo gumikan kay dili naman sila magka lisud-lisod ilabi na gayud sa mga gikinahanglanon sa mga estudyante.

Nakita nila ang pagpakabana sa PCRB sa mga batan-on ilabi na gayud sa mga out-of-school youths. – BANAT NEWS