Taga Dakit kinahanglan mamakwit

CEBU - Kinahanglang mamalhin ang mga namuyo sa sitio Dakit diha sa barangay Guadalupe nga bag-o lang nabahaan human mobunok ang kusog nga ulan sa dakbayan sa Sugbu.

Kini maoy kusganong gipadayag sa kapitan sa maong barangay nga si Eugenio Faelnar human masayod nga ang uban dili gustong mopahawa sa ilang nahimutangan.

Nasuta ni Faelnar nga mga squatters ang mga pamilya nga naapektahan sa baha tungod kay ang luna nga ilang giukupahan giingong gipanag-iya og pribadong tawo.

Tinubdan sa Banat News nitug-an nga ang luna nga gipuy-an sa gibahaan nga mga molupyo giingong gipanag-iya ni kanhi Gobernador Lito Osmeña.

Gipadayag hinuon ni Faelnar nga siya andam gihapon sa pagtabang sa mga residente aron kini mahiluna ngadto sa laing lugar.

Ang Landco Pacific Corporation nga maoy developer sa Monterrazas de Cebu nitanyag na og luna nga kabalhinan sa 14 ka pamilya diha sa sitio Dakit.

 Apan pipila ka molupyo nagduha-duha sa pagsugot tungod kay ang relocation site tua sa barangay Sapangdaku ug kini giingong kuyaw usab sa pagdahili sa yuta.

Niingon si Faelnar nga iyang tinguhaon nga ma-develop ang nahisgutang dapit ug mabuhatan og agianan sa dili pa pabalhinan. – BANAT NEWS