Karera machines gipaligsa'g pison

CEBU - Gipaligsan sa pison ang sinakmit nga 74 ka mga video karera machines sulod sa kampo sa Cebu Provincial Police Office kagahapong adlawa isip kabahin sa kampanya sa kapulisan sa illegal gambling.

Ang pagdugmok gisaksihan ni Gov. Gwendolyn Garcia ug ni Sr. Supt. Carmelo Valmoria lakip na ubang mga opisyal.

Ang mga makina gibukbok una og mga maso ug pagkahuman gipaligsan og pison aron di na kapuslan ang mga piyesa niini.

Si Valmoria nagkanayon nga ang maong mga makina nasakmit gikan sa Enero ngadto na sa Septiyembre ning tuiga diin 29 niini gikan sa dakbayan sa Talisay, tulo sa Toledo, duha sa Naga ug unom gikan sa lungsud sa Consolacion.

Samtang adunay nahibiling upat ka mga gambling machine sa police station sa Danao, 1, Consolacion, 1, ug 2 sa dakbayan sa Carcar ang maong mga illegal nga machine ilang himoong ebidensya batok sa mga operators.

Gawas pa niini aduna say mga 19 karera ang nasakmit sa Provincial Intelligence Branch (PIB) laing unom ang nasakmit sa mga opisyal sa barangay sa Lagtang ug gi-turn-over sa kapulisan.

Matud pa niini nga pabiling nag-una ang Talisay sa maong illegal nga sugal, sa miaging tuig, 61 ka mga units sa mga makina ang nasakmit.

Subay niining ilang kampanya sa illegal nga sugal iyang giklaro nga dili lang karera maoy ilang gitutukan kun dili lakip na ang paggukod niadtong mga financier ug coordinators sa masiao. – BANAT NEWS