Gi-salvage sa Carcar nailhan

CEBU - Nailhan na ang usa ka 31-anyos nga lalaki nga una nang gituohang gi-salvage ug nakit-ang patay na sa sitio Tal-ot, Valencia siyudad sa Carcar niadtong Lunes sa alas 12:40 sa kaadlawon.

Ang biktima giila sa mga kabanay nga kini si Liderato Aldaba, 31, taga barangay Guadalupe sakop sa nahisgutang siyudad.

Matud ni SPO3 Ruben Renes sa Carcar City Police dihang nahinabi sa Banat News kagahapon palang adlawa nailhan ang biktima dihang mipatim-aw sa ilang buhatan ang igsoon sa biktima nga si Heracleo Aldaba.

Gikatahong nabalaka na ang mga kabanay tungod kay pipila na ka adlaw nilang wala igkita ang ilang igsuon ug nakadawat og balitang may lalaking gipatay diha sa maong dapit nga wala pa gihapon mailhi.

Dugang impormasyon nga gihatag sa kapulisan ni Heracleo nga dunay deperensiya sa pangisip ang iyang maguwang ug magsige nalang kini og libud-suroy.

Dunay mga tabi-tabi nga gi-salvage ang biktima sa wala pa usab matumbok nga suspek o mga suspek human kini patay nang nakit-an ug dunay mga samad pinusilan sa walang abaga ug sa walang paa niini. – BANAT NEWS