23 OFWs makauli na

CEBU - Ang 23 ka mga Sugboanon nga mga Overseas Filipino Worker’s (OFW) nga nabilanggo sa nasud sa Trinidad and Tobago ang gikatakda na nga makauli sa ilang tagsa-tagsa ka mga pamilya dinhi sa Sugbu.

Ang kagamhanan sa lalawigan sa Sugbo mipadala na og kwartang ipalit nila og tiket pauli dinhi sa Sugbu sumala pa ni Marivic Garces, chief sa Provincial Social Welfare and Development Office (PSWDO) .

Si Garces miingon nga ang kagamhanan sa lalawigan migahin og salapi gikan sa general fund sa lalawigan alang sa ilang tiket gikan sa maong nasud hangtud na dinhi sa Sugbu.

Ang maong salapi adto gipadala kang Honorary Consul Maria Francisca Advani didto sa nasud sa Trinidad and Tobago kinsa mao usab ang nakig- negosasyon pagpagawas sa bilanggoan sa 23 ka mga Sugboanon nga gidakop sa mga awtoridad sa maong nasud tungod sa mini nilang mga dokumento.

Matud pa ni Garces nga nagkantidad og P82,521 ang airfare sa matag usa ka mga OFW nga mga Sugboanon nga ang pipila kanila taga Camotes ug taga dakbayan sa Mandaue dinhi sa Sugbu.

Si Garces miingon dinalian ang pagpalarga kanila gikan sa Espanya paingon sa Manila agi sa London tungod sa kabalaka nga tinud-on sa mga awtoridad sa maong nasud nga pasakaan kini’g kaso kun magdugay pagbiya sa maong dapit.

Kahinumdoman nga niadtong miaging Hunyo 18 niining tuiga nadakpan ang maong mga OFW didto sa Trinidad and Tobago tungod sa mga peke nga dokumento nga gihuptan sa ilang pagpanarbaho didto sa gawas sa nasud.

Ang mga kabanay sa maong 23 ka mga OFW uban sa ilang abogado nga si Atty. Felipe Landicho midangop kang Gov. Gwendolyn Garcia tungod kay hinay kaayo ang aksyon sa Overseas Worker Welfare Administration (OWWA) ug Department of Labor and Employment (DOLE) aron matabangan ang mga OFW. – BANAT NEWS