Siga gitumba asset sa CIDG-7

CEBU - Ang motibo sa ginadiling drugas maoy usa sa gitutukan sa imbestigasyon sa Criminal Investigation and Detection Group (CIDG-7) labot sa pagpusil patay sa ilang asset nga si Mark Pulvera, 32, niadtong Martes sa buntag diha sa F. Sotto, drive barangay Camputhaw ning dakbayan.

Kini maoy gibutyag ni Sr. Supt. Juanito Enguera, deputy sa CIDG-7 nga sa ilang “parallel investigation” isip suporta sa Homicide Section sa Cebu City Police dako kaayong kalambigitan ang ilegal nga drugas.

“Tungod sa iyang mga tips daghan mga operations sa CIDG-7 nga milampos ug gani karong adlawa duna mi i-aplay nga search warrant batok sa ilegal nga drugas apan wala naman siya dili na madayon,” sumala pa ni Enguera.

Matud pa niini nga aduna na sila karoy gikonsiderar nga mga suspects nga mipatay kang Pulvera ug ilang gipaningkamutan nga mahatagan og dinaliang solusyon.

Gawas pa niini duna usab silay laing anggulo’ng gisubay ug paabuton lang una nila ang laing impormasyon nga mahatag sa ka live-in niini sa biktima.

Alang kaniya dako kaayo’g gikatabang ang biktima diha sa ilang buhatan sulod sa usa ka tuig nga pagka-asset.

Samtang gibutyag usab niini nga ang ilang buhatan mohatag og financial assistance sa pamilya sa namatay.

Kahinumduman nga si Pulvera nabalhog kini niadtong miaging bulan sa karsel sa CCPO human usab madakpi nga naghupot og armas nga walay lisensya.

Samtang bag-ohay pa usab kining nakagawas   sa bilanggoan human nakabutang og piyansa niadtong petsa otso ning buwana.

Ang biktima gikatahong siga sa ilang lugar apan walay swerte gumikan kay niadtong milabay’ng adlaw gibuk-an kini sa ulo sa duha ka mga nagmotorsiklo nga lalaki pinaagi sa pagpusil . – BANAT NEWS