CEBU - Usa ka polis nga gitakda na untang moretiro sugod karong adlawa ang walay suwerte ug nabalhug na hinuon sa bilanggoan ug peligro pa nga dili makakobra sa iyang benepisyo human kini manghagis tungod sa kahubog ug nagwarawara pa sa armas ug nangita pa gyud kini og away ug nagpasalba sa iyang kalibre .45 nga service firearm taliwala sa karsada didto sa Sitio Suba, Poblacion, lungsod sa Sibonga niadtong Martes sa alas 3:30 sa hapon.
Ang polis nga mao nay gidakop sa mga tanod ug kagawad sa barangay mao si SPO1 Cedric Lagahid, 56, minyo, nadestino sa Sibonga Police Station ug nagpuyo ra usab sa nahisgutang lugar ug karong adlawa, ang adlaw nga gitakda sa pormal unta niining pagretiro sa serbisyo.
Ang barangay kagawad sa Poblacion nga si Matso Natividad, asawa niini nga si Rosario Natividad ug mga tanod nga sila si Wilson Bacusmo Jr., 37, Eliezer Blanco, 53, ug Raul Dante Badogdog, 46, minyo, maoy mireklamo sa kapolisan ug gitakdang mopasaka og kasong grave threats batuk kang SPO1 Lagahid.
Nasayran sa Banat News sa pagpakighinabi ni PO3 Antonio Sanchez subay sa blotter niining gibasehan base usab sa inisyal nga imbestigasyon ang suspek hubog kini niadtong tungora nga nag-wara wara sa iyang kalibre .45 nga armas sa karsada sa maong lugar ug nangita sa tanod nga si Raul.
“Asa si Raul karon kay gusto ko og patay karon,” panghadlok pa sa suspek dayong pasalba sa gibitbit nga armas niini diha sa karsada nga nakaatubang sa dagat ang posisyon.
Tungod niini daling miresponde si Kagawad Natividad ingon man ang mga tanod ug dayon ilang gitabangan og dis-arma ang maong polis tungod kay dili na kini mopatuo kun badlongon tungod sa kahubog.
Dihang nakuha ni Kagawad Natividad ang armas sa pulis gihatag niya kini sa iyang asawa ug ilahang gi-turn-over sa kapulisan apil na ang suspek.
Ang suspek nga nagtingkagol sa detention cell sa Sibonga Police Station gitakda kining pasakaan og kaso tungod kay interesado gyud ang kagawad ingon man ang nakadakop niining mga tanod pagpasaka og kaso batok niini tungod sa eskandalo nga nahimo niini.
Nakonpirmar sa Banat News gikan kang PO3 Sanchez nga karung adlawa pormal na untang moretiro sa serbisyo si SPO1 Lagahid nga ilang dugay na nga kauban sa serbisyo. – BANAT NEWS