NPA dili pabiyaon sa Negros

CEBU - Gihagit sa kadagkuan sa Central Command ang mga gidudahang sakop sa rebeldeng New Peoples Army (NPA) sa Negros Island nga dili gyud nila biyaan ang Oriental ug Occidental.

Kini ang pamahayag ni Lt. Col. Cesar Yano atol sa gipahigayong 3rd Quarter Internal Security Operation (ISO) Assesstment niadtong Lunes sa buntag diha sa Centcom nga gitambongan sa mga dagkong opisyales sa PRO-7 ug Central Command nga gipangulohan ni Lt. General Pedro Ike Inserto.

Si Yano maoy pangulo sa 503rd Brigade ug nagdumala sa 79th Infantry Batallion nga nagbase sa Negros Island midasig sa mga rebeldeng NPA nga dili biyaan ang Negros tungod kay giingong gipanalipdan sa maong walhong pundok ang mga dagkong kayutaan didto.

Gani mitug-an si Yano sa mga tigbalita nga ang gubat tali sa military ug NPA sa Negros kasamtangan pang nagpadayon ug wala nila kini lung-i paggukod hangtod nga ilang mapuhag sa hingpit ang maong pundok sa dili pa matapos ang 2010.

Napanglantawan ni Yano kung mamalhin og laing lugar ang mga rebeldeng NPA diha sa Negros dako na usab unyang problema sa laing unit sa military.

Samtang si Lt. General Pedro Ike Inserto miangkong problema pa gihapon nila ang Negros, Panay Island, ug Samar, gawas lang sa Eastern Samar nga napuhag na sa hingpit ang mga rebeldeng NPA sa maong dapit.

Matud ni Inserto nga sa Bohol ug Leyte wala na silay angayan pang kabalak-an tungod kay hingpit na usab nga napuhag ang mga sakop sa komunista.

Aduna man gani, niingon si Inserto nga pulos nalang mass supporters ang nagpabilin sa mga mga lugar apan pagka karun hinay-hinay na kining namalik sa gobiyerno ug nisurender sa ilang armas gumikan usab sa programa sa ilang Balik Baril Program diin adunay tugbang nga salapi ni bisan kinsang makauli og armas ug hatagan pa gyud og livelihood program sa local ug kagamhanan sa lalawigan

Karung Biyernes si Inserto uban sa iyang mga sakop sa Central Command molarga paingon didto aron himamaton ang 25 ka mga rebelde kinsa mitahan ngadto sa 61st IB. – BANAT NEWS