Pagkasikop sa suspek sa bomb scare gihangop ni Cortes

CEBU - Gikalipay ni Mandaue City Mayor Jonas Cortes ang daling pagkasulbad sa bomb threat sa buhatan sa palasyo sa hustisya sa dakbayan sa Mandaue sa Mandaue City Police Office.

Matud pa ni Cortes sa pakighinabi sa Banat News nga pasidunggan si MCPO OIC director Supt. Vicente Mersan Premne sa pagkasikop sa gidudahang tawo nga mipadala og suwat-hulga ni Mandaue RTC Branch 56  Hon. Judge Teresita Galanida nga paulbuhon sa mga sakop sa Moro Islamic Liberation Front ang edipisyo sa hall of justice sa dakbayan sa Mandaue sa milabay’ng adlaw.

Gumikan niini iyang ipaabot ngadto sa konseho sa dakbayan sa Mandaue alang sa pormal nga paghatag og pasidungog sa mga sakop sa Intelligence and Detection Management Branch o IDMB sa MCPO ug kang Premne pinaagi sa usa ka resolusyon.

Kahinumduman nga pinaagi sa paningkamot sa mga sakop sa IDMB nasikop si Erlinda Cagata usa ka residente sa Labangon nga maoy nagpadala sa suwat hulga nga paulbuhon ang palasyo sa hustisya sa dakbayan, apan kining tanan gipanghimakak ni Cagatan ug andam kini niyang atubangon ngadto sa hukmanan. – BANAT NEWS