Manag-inahan, sinagop gipanigbas

CEBU - Dalaga, inahan ug sinagop gipangtigbas sa silingang lalaking nisulong sa ilang panimalay kagahapon sa kaadlawon sa sitio Bandilaan, barangay Bagay, lungsod sa Daanbantayan.

Ang biktima giilang sila si Rachel Casas, 22, nagpuyo ra sa maong dapit ug silingan ra usab sa suspek nga si Radley Adarlo,18 anyos.

Lakip sa mga samaran mao ang inahan sa dalaga nga si Cipriana Casas, 55, biyuda ug ang 9-anyos nga batang nagpuyo sa ilang balay.

Ang tanod nga si Joel Yaun ang nakamatikod sa panghitabo sa dihang iyang nadungog ang syagit sa iyang silingan nga nangayo og tabang ala-una pasado sa kaadlawon kagahapon samtang siya nagkaon sa ilang balay.

Sa pagsusi ni Yaun, maoy iyang nakit-an si Rachel nga daghan na og samad sa kalawasan ug nagkawil-kawil na ang mga kuyamoy niini, usa gyud ka tudlo niini ang naputol ug mga samad sa palad human niya saw-a ang sundang matag tigbas sa suspek, duna sad siya’y mga samad sa ulo.

Nagpakitabang usab si Yaun sa iyang silingan nga si barangay kagawad Elmer Bontia sa pagtabang sa mga biktima.

Matud pa ni Rachel nga ulahi na ang iyang pagkamatikod kang Adarlo nga nisulod sa ilang balay sanglit dayon kini’g tigbas kanila ginamit ang mahait nga sundang.

Human kang Rachel, gisunod pagtigbas ang iyang inahan sa ulo, nawong, mata ug mga kamot samtang ang bata samdan sa walang abaga.

Si Yaun ug Bontia nidala sa mga biktima sa Daanbantayan District Hospital una pa sila nilahos sa Daanbantayan Police Station pagtaho sa insidente.

Sa gihimong follow-up operation nilang SPO2 Cesar Alburo, SPO2 Nero Manzanares ug PO2 Mario Versoza, ilang nasikop si Adarlo sa nahisgutang lugar.

Napunitan usab sa kapolisan ang putol nga tudlo ni Rachel ug pul-an sa sundang sa panimalay sa mga biktima.

Giangkon sa suspek ang salaod apan ang nakapahibulong sa kapolisan mao nga walay sukaranan nga himuon kini sa suspek base sa mga pamahayag niini.

“Adto man gani ko manghuwam og cellphone sa iyaha (Rachel). Wa gyud ko sa hunahuna atong higayuna sir,” sumala pa sa suspek samtang gitanggong sa detention cell sa Daanbantayan Police Station. – BANAT NEWS