6 mil pabor Guadalupe buk-on

CEBU - Mokapin na sa 6 mil ka mga pirma ang nahipos sa United Banawa-Englis Association Incorporated (UBEAI) sukad gilusad ang signature campaign niini niadtong miaging semana.

Ang signature campaign gipahigayon agig pagsuporta sa balaudnon nga gipalabang ni Kongresista Tony Cuenco alang sa hingpit nang pagbuwag sa duha ka sitio gikan sa Guadalupe.

Matud sa Vice President sa UBEAI nga si Jaime Sala, hapit na nila malibot ang tanang 57 ka purok sa Banawa ug Englis alang sa pagpanghipos og mga pirma.

Target sa UBEAI nga humanon ang signature campaign karong umaabot nga Nobyembre 10 atol usab sa pagtuki na sa balaudnon ni Cuenco didto sa kongreso.

“Tukion na man kuno ang balaudnon ni Cuenco unya sa November 10, siguro at that time moabot na og ten thousand ang mahipos namo nga pirma,” sumala ni Sala.

Nagkanayon si Sala nga sila nanginahanglan lang og kapin sa 8 mil ka pirma gikan sa rehistradong mga botante gikan sa Banawa ug Englis. Nasayran nga ang Akta Republika 5234 ni Cuenco anaa na karon sa Committee on Local Government sa Ubos Balay Balauranan alang sa deliberasyon.

Kung ang nahisgutang proposed bill maaprobahan sa maong komitiba, kini dalhon na sa plenary aron botaran sa tanang sakop sa House of Representatives.

Sa higayon nga kini maaprobahan sa mga kongresista, ang maong balaudnon dalhon sa Senado alang sa concurrence sa dili pa pirmahan ni Presidente Gloria Macapagal Arroyo.

Usa ka buwan human mapirmahan sa Presidente ang proposed bill, mahimo na nga ipahigayon ang plibisito nga pasiugdahan sa Commission on Elections (Comelec).

Malaumon si Sala nga niining higayona wala nay mamahimong babag alang sa hingpit nang pagbuwag sa Banawa ug Englis gikan sa barangay Guadalupe. – BANAT NEWS