Konseho miawhag workers paboran

CEBU - Giawhag karon sa konseho sa dakbayan sa Sugbu ang duha ka ahensya sa gobyerno nga maminaw sa panawagan sa labor ug business sector.

Kini may kalabotan sa pag-retroact sa tax exemption sa mga minimum wage earners gikan sa buwan sa Enero imbes gikan lang sa miaging buwan sa Hulyo.

Partikular nga giawhag sa City Council mao ang Department of Finance (DOF) ingon man ang Bureau of Internal Revenue (BIR).

Ang chairman sa Committee on Trade and Commerce sa konseho nga si Konsehal Arsenio Pacaña maoy mipalabang og resolusyon alang sa maong katuyoan.

Alang sa konsehal dako og matabang sa mga minimum wage earners kung kini mahatagan og refund sa buhis nga ila nang nahatag sa gobyerno.

Kini ilabi na nga nagkaduol na ang Christmas season ug tukma unya ang paghatag og refund ngadto sa yano nga mga mamumu-o.

“Nindot na nga pinaskohan sa gobyerno ngadto sa mga minimum wage earners ba nga mahatagan sila og refund sa tax exemption mao na nga kita diri sa City Council mihangyo usab sa mga hingtungdang ahensya nga kung mahimo i-retroact ang pagpatuman sa balaod,” nagkanayon si Konsehal Pacaña.

Gawas sa City Council, nasayran nga si senador Mar Roxas nagtinguha usab nga ma-retroact ang pagpatuman sa tax exemption sa mga minimum wage earners.

Miingon si Pacaña nga ang gihimo sa konseho maoy agig pagsuporta sa lakang sa senador aron mapalig-on pa ang tinguha niini.

Gipadayag sa konsehal nga sa krisis nga giatubang karon sa katawhang Pilipino angayan lang nga kini mahatagan og gamay nga konswelo.

Usa sa nakita ni Pacaña niini mao ang paghatag og refund sa mga yanong mamumu-o sa buhis nga ila nang nahatag ngadto sa gobyerno.

Alang sa konsehal, kung kini mahatag sa kagamhanan mas monindot pa unya ug mas makahuloganon ang pagsaulog sa mga Pilipino sa Pasko karong Disyembre. – BANAT NEWS