13-anyos gitigbas sa uyoan

CEBU - Nalandig sa tambalanan ang usa ka 13 anyos nga bata human kini gitigbas sa iyang kaugalingong uyoan ug naigo sa walang bahin sa tiyan didto sa Sitio Lawom Atabay, barangay Sta. Cruz, lungsod sa Ronda niadtong milabay’ng hapon sa alas 5 ang takna.

Ang biktima mao si Micheal (apelyido gipugngan) 13, samtang ang suspek mao ang iyang uyoan nga si Feliciano Apostol, 71 anyos, minyo ug pulos managsilingan nga nagpuyo sa maong lugar.

Matud ni PO2 Emirito Sansan sa Ronda Police Station sa dihang nahinabi sa Banat News subay sa blotter nga gibasehan niini usa ka tanod sa maong lugar nga si Celedenio Mag-usara maoy gi-surenderan sa suspek ug maoy mi-turn-over ngadto sa kapolisan.

Matud pa nagka deperensya ang uyoan ug ang biktima hinungdan nga mikuha og sundang ang suspek ug tungod sa iyang kalagot gitigbas niini ang biktima ug maayong pagkaigo sa walang bahin sa tiyan niini.

Gidali pagdala sa Barili District Hospital ang biktima samtang ang suspek boluntaryong mitahan sa iyang kaugalingon ngadto sa tanod nga maoy mihatod kaniya sa kapolisan ug nagbalhog na karon sa detention cell samtang nagpaabot sa tukmang kaso nga ipasaka batok niya.

Padayon pa karong gi-imbistigar sa kapolisan ang pagtumbok sa tinuoray’ng hinungdan sa pagpanigbas sa uyoan ngadto sa 13-anyos niyang pag-umangkon. – BANAT NEWS