2 magsuon nga Muslim gipamusil

CEBU - Usa ang patay sa managsoong Muslim nga dealer og NFA rice nga gipamusil sa duha ka tawo nga nagmotorsiklo kagahapon sa buntag didto sa sitio Iba, Barangay Basak, dakbayan sa Lapulapu.

Ang mga biktima mao sila si Talib Macaba, 40, residente sa Brgy. Ibo, dakbayan sa Lapulapu ug ang igsuon niini nga si Subaer Macaba, 20, ulitawo nga residente sa Camella Homes, Barangay Bankal, dakbayan sa Lapulapu.

 Base sa imbestigasyon ni PO3 Elmer Canillo sa Homicide Section nasayran nga si Talib adunay bag-ong tindahan sa sitio Iba, barangay Basak, dakbayan sa Lapulapu, samtang si Subaer mibisita lamang sa igsuon niini sa maong tindahan.

 Mga alas 8 kagahapon sa buntag duha ka tawo nga luwan og motorsiklong itom ang nag-angkas miduol sa tindahan ni Talib ug kalit kini nga namusil hinungdan sa pagkahiagum ni Talib og samad pinusilan sa iyang bukton ug sa wala nga bahin sa tiyan.

 Sa dihang nakita ni Subaer ang iyang igsuon nga gipusil gilayog niini ang suspetsado ug nangilog sa armas, apan ang kauban sa suspetsado nga nagmaneho sa motor maoy mipusil ni Subaer hinungdan sa pagkahiagum niini og samad pinusilan sa iyang hawak.

 Ang managsuon gidali kini og dala sa Mactan Doctors Hospital diin pipila ka oras nakabsan gyud sa kinabuhi si Talib samtang si Subaer nagpaalim pa sa samad nga nahiaguman niini.

 Hangtod ning pagsuwat sa balita, wala pa matugkad sa mga imbestigador kun unsay motibo sa maong pagpamusil ug kinsa ang mga responsable niini gumikan kay walay kahadlok ang mga mamumuno nga mipusil sa magsuon kay wala kini magtaptap sa ilang mga dagway. 

Samtang pipila ka mga silingan sa maong dapit midayeg ni Talib gumikan sa kamaayo niining tawo sa ilang komunidad hinungdan nga wala sila'y nakitang dautang motibo sa maong krimen. – BANAT NEWS