Tawo gipusil sa nanutok niya

CEBU - Usa ka tawong nasuko kay gitutokan siyag tan-aw, napusilan dihang gikonprontasi niya ang nanutok kaniya didto sa public market sa lungsod sa Consolacion niadtong miaging gabii.

Ang biktima mao si Roberto Redoblo, 20, ulitawo, lumad nga taga lungsod sa Medillen apan kasamtangang nagpuyo sa barangay Nangka, Consolacion.

Samtang ang miluthang kaniya, wala mailhi apan giingong mobuon nga gamayon ug kulongon ang buhok.

Si SPO3 Hercules Aligno sa Consolacion Police Station mibutyag sa Banat News nga nag-inom ang biktima kauban sa iyang live-in partner ug usa ka igsoon niya, sa usa ka tindahan sulod sa merkado.

Samtang sa laing lamesa dili layo sa lamesa sa biktima didto usab ang usa ka tawo nga nag-inom uban sa iyang barkada,   nga nagpunay og tutok sa biktima.

Apan dihang nakamatikod ang biktima nga gipunayan siya’g tan-aw sa tawo, iyaha kining giduol ug gisukit unsay hinungdan nga nagpunay man kini og pasiplat kaniya.

Paglabay sa pipila ka gutlo, ang tawo nga wala manumbaling sa konprontasyon nga gihimo sa biktima kaniya, migawas sa tindahan uban sa iyang mga kainom.

Apan misunod usab ang biktima ug didto sa pultahan sa merkado naabtan niya ang maong tawo ug gisukna na usab niya (biktima) kun unsay gusto niini nganong nagpunay man kini og tan-aw kaniya.

Apan ang maong tawo inay motingog ug motubag, milanit na hinuon sa gitangkil niyang armas de fuego ug gipusil ang biktima.

Nabuslot ang bagolbagol sa biktima ug gidali kini paghatod ngadto sa Vicente Sotto Memorial Medical Center (VSMMC) samtang ang miluthang kaniya mikaratel usab og dagan pahilayo sa merkado ug wala gyuy nakaila niini hinungdan nga naglisod usab ang kapolisan sa pagsikop niini.  (BANAT NEWS)