Polis maoy pasusihon sa sunog gisupak

Dili pabor si Konsehal Raul “Yayoy” Alcoseba sa plano nga ang mga polis na maoy paguniton sa imbistigasyon kun dunay sunog nga mahitabo sa siyudad.

Ang chairman sa Cebu City Disaster Coordinating Council (CCDCC) nga si Konsehal Gerardo “Gerry” Carillo maoy nagtinguha sa maong lakang.

Kini tungod usab sa pagtuo ni Carillo nga ang kapolisan dunay igong kasinatian kung imbistigasyon na maoy hisgutan itandi sa kabumberohan.

Nakuha ni Carillo ang maong ideya human sa iyang pagtambong og duha ka semana nga international disaster response seminar didto sa Singapore.

Gibutyag sa konsehal nga didto sa nahisgutang nasud, ang kapolisan maoy muhupot sa imbistigasyon kun dunay mahitabong sunog.

Apan matod ni Konsehal Alcoseba nga impractical ang nahisgutang paagi kung sagupon dinhi sa nasud ilabi na dinhi sa dakbayan.

Kini tungod kay giingong daghan na og gimbuhaton ang kapolisan ug naglisod nang daan pagtuman alang sa epektibo nilang pagpangatungdanan.

“Daghan na kaayo og trabaho ang polis ato pang pun-an, daghan gani kaayong wa matrabaho sa polis dugangan pa nato og trabahoon,” sumala ni Alcoseba.

Ang konsehal nga maoy vice chairman sa Committee on Public Order and Safety sa City Council niingon nga mapangitaan ra og sulusyon ang problema nga dili ilambigit ang kapolisan.

“Kanang bombero duna man nay investigation section, kana maoy atong palig-onon, seminaron ba ang mga imbestigador aron mahimo silang mas epektibo,” dugang ni Alcoseba.

Nasayran gikan sa usa ka opisyal sa Cebu City Fire Department nga nalatid sa Fire Code of the Philippines nga ang pag-imbistigar sa sunog gitugyan ngadto sa kabomberohan.

Apan nadismaya si Carillo sa iyang nasayran tungod kay sa 99 ka kaso sa sunog niining tuiga, duha lang ang napasaka.

Gusto sa konsehal nga lakip nga pasakaan og kaso mao kadtong tag-iya og panimay diin naggikan ang sunog, kung ma-establisar nga kini nagpabaya.