'Nabikogan' nalumos namatay

Patay na nga napalgan ang usa ka lalaking gituuhang nalumos samtang naligo sa dagat diha sa ilawom sa Marcelo Fernan Bridge sa habig nga bahin sa barangay Umapad, dakbayan sa Mandaue.

Ang namatay giila nga mao si Mario Moral, taga barangay Paknaan sa dakbayan sa Mandaue kinsa napalgang patay kagahapon sa buntag nga naglutaw sa kadagatan sa sitio Salvage sa Looc dakbayan sa Lapulapu.

Si PO1 Broz Taneo sa Presinto 5 sa Opao Police Station nga nahinabi sa Banat News miingon nga usa ka Charlie Manatad, 27 anyos ug silingan sa namatay maoy nipahibalo sa ilang buhatan sa maong hitabo.

Matud pa ni Manatad naligo ug nagsawom-sawom sila sa biktima dihang kalit lang kining gibikogan ug nagpatabang kaniya hinungdan nga iya kining gisuwayan og salbar.

Apan tungod sa sulog sa dagat nagkaanam og kaanod silang duha sa biktima ngadto sa tunga-tungang bahin sa Mactan Channel hinungdan nga iya kining gibuhian.

Gitug-an ni Manatad nga gitabang usab siya sa laing mga tawo nga naligo usab sa maong dapit apan wala na gyud niya igkita pa si Moral.

Si PO1 Taneo miingon nga daling milusad og search and rescue operation ang mga divers sa Philippine Coast Guard (PCG) apan wala na kini igkita.