Gitinguha sa suspendidong Cebu City Fire Marshall Superintendent Ismael Codilla nga mahibalik na sa katungdanan tungod kay dako ang iyang pagtuong harassment ra ang maong kasong administratibang gipasaka batok kaniya.
Suspendido og tulo ka buwan si Codilla sukad niadtong miaging buwan, human mapasakai og kasong administratiba tungod usab sa giingong kapakyas sa fire marshall pag-liquidate sa fuel allocation sa Cebu City Fire Department.
Apan alang kang Codilla nga ang kaso nga gipasaka batok kaniya usa lang ka harassment ug walay igong basihanan.
Kini ang hinungdan nga ang suspendidong fire marshall nisang-at og injunction sa hukmanan kagahapon aron malibkas ang suspension ug makabalik sa posisyon.
“Nisang-at ko og injunction kay harassment ra man gud ning ilang gihimo, bisan tuod og preventive suspension ra ning ato, pero para nako silot man gyud ni,” sumala ni Codilla.
Gitumbok ni Codilla nga nangusog nga siya masuspenso mao ang kanhi regional director sa Bureau of Fire Protection (BFP-7) nga si Senior Superintendent Eleuterio Iturriaga.
Si Iturriaga gihulipan na hinoon sa posisyon niadtong miaging buwan ni Senior Superintendent Aloveel Ferrer ug nabalhin na ngadto sa kauluhan.
Samtang ang kasamtangang nihulip kang Codilla sa katungdanan mao si Major Victor Vibares nga nahimo na usab nga fire marshall sa Cebu City Fire Department.
Giparelibuhan hinoon si Vibares ni Mayor Tomas Osmeña sa iyang posisyon kaniadto tungod sa kasuko niini ngadto sa nahisgutang opisyal.
Kini human masayri sa mayor nga si Vibares namyesta didto sa dakbayan sa Dumaguete dihang niulbo ang usa ka dakong sunog dinhi sa siyudad.
Malaumon si Codilla nga paburan sa korte ang iyang gisang-at nga injunction tungod kay ang gipasangil kaniya giingong iya nang natubag uban sa paghatag og kwentada.