Bomb scare sa CH, papel ra

Naukay ang mga tawo diha sa Cebu City Hall kagahapon sa buntag human kalit nangabot ang mga sakop sa Special Weapon and Tactics tungod sa nadawat nga tawag sa teleponong may duha ka kadudahang kartong gibilin sulod sa duha na ka oras.

Ang SWAT team ug ang ilang bomb disposal expert misusi sa maong mga karton samtang nanguryoso ang mga tawo diha sa layo ug kulbahinam nga nagpaabot sa unsay resulta sa paghiling.

Dihang nabunlot na ang sulod 20 ra diay ka rims sa mga long size bond papers nga may brand nga “Sachi.”

Si Pablito Noval, nga usa sa mga sakop sa Barangay Intelligence Network nga nagbantay diha sa entrance sa City Hall nagkanayon usa ka van nga kolor puti ang mi-park diha sa parking area ni Cebu City Councilor Edgardo Labella.

Ang driver sa van nga may kaubang “Intsikon” nga lalaki iyang gipahimangnoang dalion ang pagdiskarga kay moabot na si Labella ug mogamit sa parking space niini, tuod man miabante ang van ug mihunong sa entrance sa buhatan ni Bise Mayor Michael Rama ug nagdali ang drayber pagkarga og upat ka kahon sa maong box.

“Pero duda ko nabiya-an to ang duha ka packages. Unya wa man mi kalibutan ug unsa ang sulod ato kay mga duha ka oras na wa man lang gihapon gikuha. Aron makasiguro mi, nanawag na lang mi sa SWAT,” sumala pang Noval.

Si SPOI Dennis Sosmeña sa SWAT ug kaubanan daling mihikot sa maong karton ug human masigurong di delikado ang sulod niini ilaha kining gidala sa ilang buhatan aron ma-rekord.

Atol ning pagsulat sa balita wala pay niduol aron i-claim ang maong mga papel.