Mas daghang krimen sa riding in tandem ang R-7

Nag-una ang Rehiyon-7 sa tibuok nasud sa talaan sa mga insidente sa krimen nga binuhatan sa mga tawong magsakay og motorsiklo kumparar sa ubang dapit ug sagad niini nahitabo ug natala dinhi sa Cebu City.

Tungod niini miumol ang Police Regional Office (PRO-7) sa Task Force Motorcycles nga maoy motutok niadtong mga lalaking magsakay og motorsiklo.

Matud pa ni PRO-7 chief Ronald Roderos ang rehiyon maoy nag-una karon sa crime statistics may labot sa mga kriminal nga magsakay og motorsiklo sumala pa sa Camp Crame.

Si Sr. Supt. Drusillo Bolodo ang chief Deputy Regional Director for Operations (DRDO-7) maoy gitahasang mangulo sa maong task force ug ang mga miyembro langkuban sa mga nag-unang mga special units sa mga police stations.

Wala ikahimuot sa heneral ang maong report gumikan kay siya maoy pangulo sa kapolisan dinhi ug dinhi na usab nanimuyo ang iyang pamilya.

Tungod niini, mas higpitan pa sa kapolisan ang pagpahigayon og random checkpoints sa tibuok rehiyon ug kwestyunon gyud ang mga motoristang magmotor.

Base sa crime statistics gikan sa Camp Crame gikan sa Enero hangtud na sa Agosto ning tuiga, nag-una ang rehiyon sa maong matang sa krimen nga naglambigit sa nag-motorsiklo gumikan kay moabot sa 147 ka insidente niini dinhi sa dakbayan sa Sugbu.

Atol sa command conference sa kapulisan sa dakbayan sa Sugbu nga gitambungan sa mga opisyal sa LTO-7 nahisgutan ang laraw alang sa lakang nga pagbutang og plate number sa atubangan sa mga motorsiklo gawas sa naandang sa luyo lang.

Samtang gitinguha usab nila nga mapatuman ang color coding sa mga motorsiklo nga moagi sa matag dapit, ingon man ang posibleng pag-ban niadtong mag-angkasay sa motorsiklo.