Bomb threat sa M'daue court

Gipalihok na karon sa Police Regional Office ang ilang tanang intelligence units aron ma-trace ang suwat nga nanghulgang bombahan karong adlawa sa mga bag-ong recruit sa Moro Islamic Liberation Front (MILF) ang Palace of Justice sa dakbayan sa Mandaue.

Si PRO-7 Chief Supt. Ronald Roderos nagkanayon wala pa nila matumbok ug padayon pang gisubay kung ang kinsa nagpadala sa maong sulat ngadto kang RTC branch 56 Judge Teresita Galanida niadtong Biyernes sa hapon.

Gitahasan si Sr. Supt. Melvin Buenafe ang hepe sa Regional Intelligence Division sa (PRO-7) nga butangan og mga escorts si Galanida sa ingon masigurong luwas kini.

Dugang pa niini gihugtan na usab ang seguridad sa maong edipisyo ug lukop sa ubang bahin sa lalawigan kabahin sa maong hulga.

Subay niini iyang gibutyag nga ila usab sutaon ang background ni Judge Galanida samtang nadestino pa kini isip huwes didto sa Dumaguete, Negros Oriental.

Kini aron usab masuta kun wala bay mga tawong nasilo kaniya sa mga kanhi niya assignments.

Ang maong suwat gikatahong gikan sa usa ka babaye nga nagpailang asawa sa bag-ong recruit sa MILF nga nagpahibalo nga paulbuhon nila ang korte sa Mandaue City karong adlawa.

Sa kabalaka sa maong huwes gipa-blotter niya kini sa station 1 sa dakbayan sa Mandaue.