Nanulis sa papa sa bise mayor sa Sibonga nasikop sa Mandaue

CEBU – Nadakpan sa kapolisan ang nanulis sa usa ka negosyante ug amahan ni Sibonga Bise Mayor Nestor Ponce didto sa barangay Umapad siyudad sa Mandaue niadtong Biyernes sa ala-1 sa kaadlawon.

Ang gidakop nila ni PO3 Dario Gabac ug PO2 Roque Cinarillo III pulos sakop sa Sibonga Police Station didto sa Umapad Mandaue, mao si Marvin Montefalcon alyas Malabaka, 19-anyos, ulitawo, ug molupyo sa barangay Tubod sa bukirang bahin sa Sibonga.

Matud ni PO2 Niño Ibo sa Sibonga Police Station sa dihang nahinabi sa Banat News subay sa blotter niining gibasehan nadakpan ang suspek dili tungod sa kasong pagpanulis kun dili tungod sa warrant of arrest sa kasong pagpamusil nga giluwatan ni MTC Judge Delfin Desierto.

May labot kini sa kalambigitan sa suspek sa pagpusil ngadto sa bata-bata sa usa ka British national nga nagpuyo sa barangay Tubod, Sibonga niadtong milabay’ng bulan sa Mayo.

Si Montefalcon misakiyo sa P200 mil nga kuwarta sa amahan sa bise mayor nga si Menyong Ponce. – BANAT NEWS