Baroto Regatta malampuson

CEBU – Malampuson ang paglusad kagahapon sa buntag sa “Baroto Regatta” sa kadagatan sa Talisay City diin napuno sa katawhan nga misaksi sa maong kalihokan ang baybayon sa barangay Poblacion, sa maong dakbayan.

Ang “Baroto Regatta” usa ka lumba sa sakayan nga gigamitan lang og bugsay ug layag uban sa tema nga “Balik Baroto ug Layag Na Ta, Gasolina Mahal Na!”.

Sa 24 nga nagpalistang sumasalmot, 19 ra ang miapil kay naulahi ang uban.

Gisugdan ang lumba sa alas 9:30 sa buntag, ang matag baroto gisakyan og tagduha ka tawo, diin ang   starting point mao ang Tourist Seaside Hotel sa barangay Poblacion paingon ngadto sa Puntagon Reef unya liko paingon sa Lagundi Reef ug balik dayon sa Tourist Seaside Hotel isip finishing place.

Nahimong mananaog ang managsuong Lyndon ug Ricardo Sumandig , ang ikaduha mao sila si Pontaciano Silab ug Bernie Honteveros samtang ang ikatulong mananaog mao sila si Martin Espra ug Gilberto Obrero.

Si kanhi Customs Collector David “Boy” Odilao kinsa maoy tsirman sa City Fisheries And Aquatic Resources Management Council (CFARMC) sa Talisay maoy nagpasiugda sa nahisgutang kalihokan.

Atol sa paglusad sa maong kalingawan, si Gobernador Gwendolyn Garcia kinsa nagsaulog sa iyang ika- 53 nga birthday maoy pinasidunggang dinapit ug mao usab ang mipabuto sa starting gun.

Kini mao pay unang higayon sa pagpasundayag sa maong kalihokan ug sa unang higayon nasaksihan usab sa gobernador ang makalingaw kaayo nga lumba sa mga barotong gipadagan pinaagi sa layag ug bugsay.

Si Garcia kinsa usa ka adopted daughter sa siyudad sa Talisay misaad nga motabang sa nahisgutang proyekto nga gilaumang mapalambo pa ug ipahigayon matag tuig.

Si Odilao nagkanayon nga ang Baroto Regatta posibleng himoon na unya nga usa ka “summer festival” sa dakbayan.

Si Konsehal Bernard Odilao kinsa tsirman sa komitiba sa kalikupan ug anak sa kanhi Customs Collector miawhag usab sa mga mananagat sa pagpreserbar sa kalilupan ilabi na sa kadagatan nga maoy ilang gikuhaan og panginabuhian.

Sila si Bokal Juan Bolo, uban sa mga department head sa Kapitolyo, ingon man si Konsehal Shirley Belleza, ug Bise Mayor Lani Abarquez sa dakbayan sa Talisay mitambong usab sa maong kalihokan.

Si Mayor Socrates Fernandez wala makatambong tungod kay aduna kini gitambongang kalihokan didto sa Davao.

Ang nag-unang tulo ka parisang mananaog kinsa pulos taga barangay Tangke, Talisay City nagpakadawat og P20,000, alang sa una , P15,000 sa ikaduha ug P10,000 sa ikatulong ganti.

Ang ika-upat ug biktima tag P5,000 ug P3,000 ang usag-usa ka parisan , samtang sa ika-unom ngadto sa ika-napulo, tagsa ka sakong bugas, ug ang ika –11 hangtod sa katapusang iwit o ika-19 nagpakadawat og tagtulo ka kilong bugas ug mga grocery packs. – BANAT NEWS