Rollback sa plite hapit na

CEBU – Gitataw sa ahensya sa kagamhanan nga nagdumala sa mga sakyanan sa nasud ang dakong kalagmitang pagpa-rollback sa plitehan karong maghinapos ang Oktobre o kaha sa unang semana sa Nobyembre.

Matud pa ni Regional Director Romulo Bernardes sa Land Transportation Franchising and Regulatory Board (LTFRB) nga gitun-an pa karon sa ilang ulohang buhatan sa Manila ang petisyon sa pagpa-rollback og P2 sa plitehan sa public utility jeepneys (PUJ) sa Central Visayas.

Gawas ning maong petisyon nga gisang-at ngadto sa LTFRB   pinaagi ni kanhi Regional Director Manuel Iway sa maong ahensya, ang mga sumasakay miyangungo usab bahin niini.

Kini sa dihang nasayran sa publiko ang hilabihang pagsawom na karon sa presyo sa mga produkto sa petrolyo.

Busa alang kang Bernardes nga bisan kun gisupak kini sa mga drayber ug tag-iya sa PUJ, apan wala silay mahimo kun imando na sa LTFRB Manila ang pagpakunhod sa plitehan.

Gani miingon si Bernardes nga kun magpadayon pa ang pagkibra sa presyo sa   gasolina ug krudo, may dakong posibilidad nga mokibra usab og P2.50 ang minimum nga plitehan sa mga PUJ.

Sa pagkakaron P8 ang minimum nga plitehan dinhi sa Rehiyon 7   nga gibase pa kini sa milabay’ng mga buwan dihang misaka ngadto sa himabaw sa P60 matag litro sa gasolina ug krudo.

Karong misawom na pagbalik ang presyo sa mga sugnod sa sakyanang de motor, si Bernardes nagkanayon nga dili mahimong magpakahilom ang LTFRB niini.

Mohimo usab kini og lakang aron ihatag ang hustisyang gikinahanglan sa katawhan alang sa patas nga panginabuhi sa tanan, sumala pa ni Bernardes. – BANAT NEWS