Bangko mitabang sa negosyante

CEBU – Gipadayon sa Plantersbank ang ilang pagtabang sa gagmay nga mga negosyante alang sa pagpakaylap sa kasayoran sa ilang mga produkto pinaagi sa pag-down load niini nga libre ngadto sa internet sa ilang computer.

Kini mahimo pinaagi sa Bizster (www, bizster. Com) nga usa ka on line nga luna sa negosyante diha sa internet, aron masayran sa tibuok kalibotan ang matang sa ilang produkto.

Ang Bizster maoy usa ka proyekto sa SME Solution Inc. (www sme.com,ph) ug joint venture kini sa World Bank’s International Finance Corporation (IFC) ug Planters Development Bank.

Ang presidente sa SME Solution Inc nga si Adonis Yap sa press conference nga gihimo niadtong miaging adlaw mipasabot nga kini ilang gihimo agig pagtabang sa gagmay nga mga negosyante.

Dugang pa niya nga usa kini sa mga paagi sa pagpalambo sa negosyo pinaagi sa pagsabwag sa kasayoran nga idownload sa internet diha sa computer.

Gitataw ni Yap nga sukad sa ilang pagpasiugda sa maong programa pipila na ka bulan ang nakalabay nasuta nila nga may gatusan na ka mga gagmay nga negosyante nga nakahimo na sa pag-download ngadto sa computer sa mga impormasyon bahin sa ilang mga produkto.

Si Yap miingon nga gipaabot pa nila nga daghan pang mga negosyante nga mosagop sa ilang programa alang sa pagpalambo sa gisudlan nga negosyo sa gagmay nga mga negosyante. – BANAT NEWS