Menor nanglungkab tiklo

CEBU – Nadakpan sa kapulisan ang duha ka magsuong menor de edad nga maoy suspek sa mga kawat ug pagpanglungkab sa mga tindahan didto sa lungsod sa Daanbantayan, Cebu.

Didto gyud dakpa sa kapolisan ang maong mga suspek sa pinuy-anan niini ug gitawag lang sa kapulisan sa dili tinuod nilang ngalan nga Rod, 13, ug ang manghod niining si Pax, 12, nga taga barangay Poblacion, Daan Bantayan.

Ang mga suspek maoy gitumbok nga milungkab kagahapon sa kaadlawon sa duha ka mga tindahan nga Jinky Dry Store diin gibana-banang mokabat sa P24 mil ang balor sa nagkadaiyang klase sa mga baligya ang nawagtang.

Nasayran nga ang maong mga suspek mao usab ang gipasanginlang milungkab sa R & S Drygood Store niadtong petsa 8 ning bulana nga nakuhaan usab og P2,400 nga balor sa mga tinda niini.

Matud ni PO2 Edwin Dignos sa Daanbantayan Police Station nga usa ka Lito Baroyo nga silingan sa mga suspek kinsa maoy nakakita sa paglungkab niini sa Jinky Store mitumaw ngadto sa ilang buhatan ug maoy naggiya kanila aron madakpan ang mga suspek.

Atol sa gihimong follow -up operation sa kapulisan, nabawi niini ang ubang mga kinawat nga butang didto sa balay sa mga suspek nga naglangkob sa 35 ka nail cutter, 25 ka padlock, 4 ka tsinelas nga Islander, 7 ka sports leather, 2 ka gold sandal, 5 walker slipper, 7 ka bola, 2 ka kaldero, 2 ka dosena nga senina, 10 ka buok senina nga kolor puti, 18 ka maong short ug 15 ka parisan sa sapatos nga gibana banang moabot og P24 mil gikan sa Jinky Store nga gipanag-iya sa usa ka Jackelyn Sato.

Dihang gikahinabi sa kapulisan ang amahan sa mga suspek nga giila lang nga Senior, wala kini moreklamo bahin sa pagdakop sa iyang mga anak. – BANAT NEWS