51-anyos gisundan, gitigbas

CEBU – Kritikal ang kahimtang sa usa ka 51-anyos nga lalaki human kini gisundan ug gitigbas sa iyang silingan samtang naglakaw didto sa barangay Climaco, siyudad sa Toledo, niadtong Biyernes sa hapon.

Si Jacinto Dayday, 51, naapsan gyud sa sanggot nga gitigbas sa iyang silingan nga si Felipe Catubis, 33, ulitawo hinungdan sa samad tinigbasan sa bukobuko.

Sa dihang nakalingi si Dayday, gisundan pa gyud kini og tigbas ni Catubis hinungdan sa pagkaigo sa iyang walang bahin sa nawong.

Misibat si Catubis human sa hitabo, apan mitahan kini ni Kapitan Antonio Canonigo sa barangay Climaco.

Si Dayday gitabang sa mga silingan ug gidala sa Toledo District Hospital apan tungod sa seryosong kahimtang niini, gibalhin kini sa tambalanan dinhi sa dakbayan sa Sugbu.

Matud pa ni SPO2 Carmilito Hornales sa Toledo Police Station sa dihang nahinabi sa Banat News nagkanayon nga naglakaw lamang si Dayday paingong mopauli gikan nga nagpatambal sa usa ka albularyo sa sikbit nga barangay sa dihang gisundan ni Catubis. – BANAT NEWS