CEBU – Graduating sa kursong Nautical karong sunod semana sa University of the Visayas gipusil patay sa nagsakay og kotse kagahapon sa alas 12:30 sa kaadlawon diha sa may eskina V. Gullas ug Mabini barangay Parian ning dakbayan.
Ang dead-on-arrival sa Cebu City Medical Center (CCMC) giila sa kapolisan nga si Junel Sumayang, 24, ulitawo, taga Villa Aurora Compound, barangay Kasambagan ning dakbayan ug lumad nga taga Campusong, lungsod sa Borbon.
Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office gikatahong naglakaw ang biktima nga si Sumayang uban sa higala nga si Nizraim Olferenez Jr. padulong mopauli gikan nag-inom sa KTV-2.
Dihang kalit lang miabot ang suspetsadong nagmaneho og kotse nga kolor gray nagtangag sa plate number TES-835 nga nanaog dayon pusil sa biktima.
Ang biktima ug ang kauban niini nakadagan pa apan gi-usban sa pagpusil hinungdan nga maayong pagka-igo sa tuong bahin sa dughan ug nahagba lima ka metros ang gilay-on sa gidaganan niini samtang ang kauban niini nakadagan pa ngadto sa boarding house sa iyang mga higala.
Usa ka 21 anyos nga saksi mitug-an sa mga imbestigador nga uban siya sa iyang mga higala ug igsuon diha sa pikas nga bahin sa dalan sa dihang ilang nadungog ang boto sa armas.
Dihang ilang gisusi nakita niini ang ikaduhang pagpusil sa suspetsado nga nagbarog tupad sa gisakyang kotse ngadto sa biktima, dayon sibat agi sa dalan duol sa Cebu Metropolitan Cathedral.
Gidali unta sa pagdala sa tambalanan apan gideklarar sa mga doktor sa CCMC nga dead-on-arrival ug ang wala pa matinong klase sa bala sa armas nag-ungot pa sa dughan sa biktima.
Ang kapolisan wala pa makakumpleto kun unsay tinuoray’ng motibo sa pagpamusil sa suspetsado ngadto sa biktima. – BANAT NEWS