Liloan patabang sa Capitol

CEBU - Mihangyo ang kagamhanan sa lungsod sa Liloan nga magpatabang sa Kapitolyo sa pagpaayo sa 11 nila ka edipisyo sa eskuylahan kabahin sa ilang pagpangandam sa pag-host sa provincial sports meet.

Si Mayor Vincent “Duke” sa Liloan miingon nga ang maong mga eskuylahan maoy himuon nilang kuwartel sa mga atleta ug sa mga opisyales nga gikan sa nagkalain-laing lungsod ug siyudad sa tibuok probinsya sa usa ka semanang kalihokan nga sugdan karong sunod bulan.

Ang onse ka edipisyong tunghaan sa Liloan gibana-banang mogasto og mokabat sa P2.2 million sa pagpaayo niini.

Kini mao ang Jubay Elementary School, Simeon Ayuda School, Arcelo Memorial High School, Yati Elementary School, Tiltilon Elementary School, Tayud Elementary School ug Calero Elementary School.

Lakip usab sa listahan ang Liloan National High School, Catarman Elementary School, Suba Elementary School ug Liloan Central School.

Mipadayag og kahinangop si Mayor Frasco tungod kay nasayod siya nga kining maong kalihokan maghatag kini og maayong kinitaan sa ekonomiya sa lungsod nga gibanabana niyang P5 milyones ang kitaon nila niini.

Midugang si Frasco nga ang pag-host nila ning tibuok lalawigan nga kalihokan sa paugnat sa kusog usa ka dakong hagit ug kahigayonan aron mosilaw pag-ayo ang Liloan gumikan kay kaliboan ka mga tawo nga gikan sa walo ka dakbayan ug 45 ka lungsod ang modagsa sa maong lungsod.

Ang mayor mihulma dayon og 22 ka komitiba diin 12 niini maoy mga sub-committees aron tahasan sa pag-andam sa maong kalihokan.

Si Mayor Frasco maoy overall management committee chairman kinsa uban kaniya ang iyang bise mayor nga si Thelma Jordan, uban sa executive secretary Aljew Frasco ug Hammurabi Bugtai.

Ang katapusang duha ka provincial meet gipahigayon didto sa lungsod sa Balamban. – BANAT NEWS