Temporaryong rollback sa plite gisugyot

CEBU - Gisugyot sa kanhi opisyal sa Land Transportation Franchising and Regulatory Board (LTFRB) ang temporaryong pagpa-rollback sa plitehan sa mga sakyanang pasaheroan dinhi sa rehiyon 7.

Kini ang nakab-ot nga hukom ni kanhi Regional Director Manuel Iway sa Land Transportation Franchising and Regulatory Board (LTFRB) 7 dihang nabulit sa mga pagsupak ug pagsaway sa mga hingtungdang drayber ang iyang pitisyon pagpa-rollback og P2 sa minimum nga plitehan sa public utility jeepney (PUJ).

Gawas sa plitehan sa PUJ, gipatangtang usab ni Iway ang P10 nga “add on” sa plitehan sa taxi.

Apan bisan pa niini, ang mga drayber ug operatror sa mga PUJ nga sakop sa Nagkahiusang Drayber sa Sugbo, (NADSU), lig-on gihapon sa ilang mga pagsupak niining maong lakang ni Iway.

Matud pa ni Ruben Rama, tsirman sa Nadsu, nga gawas lang kun mosukarap na hangtod sa P30   matag litro ang presyo sa gasolina ug krudo, dili sila mosugot nga i-rollback ang plitehan.

Kini tungod kay alang kang Rama wala pa sila makabawi sa hilabihang kaalkanse nila sa nanglabay'ng mga buwan dihang misaka pag-ayo ang presyo sa gasolina ug krudo.

 Matud pa ni Rama nga may mga higayon nga bisan lugaw wala nay nakaon ang ilang mga anak kay ang ilang kinitaan kuwang ra sa krudo ug sa abangan sa sakyanan.

Hinoon miingon si Iway nga kun gahi man ang mga drayber karon ning iyang pitisyon, mahumok ra sila daw mamon kun ang komisyoner na sa LTFRB Thompson Lantion mao nay mopakanaog og desisyon nga irollback og P2.50 ang minimum nga plitehan sa mga PUJ dinhi sa rehiyon.

Miingon si Iway nga wala nay ikapangatarungan ang mga drayber ug operator niini, ilabi na nga nasayod sila nga ang pagpadayong rollback karon sa presyo sa krudo ug gasolina ug uban pang produkto sa petrolyo mosangpot usab kini sa pagbahar sa presyo sa mga piyesa sa sakyanan. – BANAT NEWS