Gitulis sa pasahero

Nawad-an sa iyang tibuok gabiing kinitaan sa pagpamasahero ang usa ka taxi drayber human kini gitulis sa tulo ka wala mailhing mga lalaki nga iyang pasahero nga nagpahatod sa Marigondon, dakbayan sa Lapulapu.

Ang biktima mao si Vicente Lareta, 53 anyos, minyo nga taga barangay Labangon, dakbayan sa Sugbo ug drayber sa Tiger Taxi nga nagdala sa plate number GXE 374.

Si PO1 Gilbert Mapili sa Theft and Robbery Section (TRS) sa kapolisan sa maong dakbayan nga nahinabi sa Banat News miingon nga gikan sa dakbayan sa Mandaue ang tulo ka tulisang misakay sa biktima.

Nagpahatod ang tulo sa barangay Marigondon alas 3 pasado ang takna sa kaadlawon apan sa ilang paghidangat sa maong dapit ang usa sa mga pasahero nga naglingkod sa luyong lingkoranan ang kalit lang mition og kutsilyo ug mideklarar nga tulis.

 Matud pa ni PO1 Mapili nga gikuha sa tulo ka tulisan ang iyang salapi nga mokabat sa P9,050 kantidad nga kinitaan niya sa pagpamasahero ug nagdali kini sa pagpanganaug sa maong dapit.

Si PO1 Mapili miingon nga dihang ilang nadawat ang maong taho sa pagpanulis dali usab kini nilang gisusi apan wala na nila igkita ang mga tulisan.