Gidunggab, gibukbok sa tulisan

Nakaangkon og daghang samad dinunggaban ug gidukdok pa og bato sa ulo ang usa ka estudyanteng dalaga human kini misukol sa suspetsadong tulisan sa iyang paglakaw sa dalan paingon na untang mopauli sa balay sa sitio Taboc Sapa barangay Jaclopan siyudad sa Talisay niadtong Huwebes sa alas 7:35 sa gabii.

Ang biktima mao si Joy Cerna Eleguin, 18 anyos, dalaga ug 2nd year student sa Cebu Normal University (CNU) ug molupyo sa nahisgutang lugar.

Samtang ang nag-inusara nga suspek nga wala pa mailhi sa kapulisan daling nakaikyas ug nagtaptap sa iyang nawong.

Matud ni PO1 Adrian Mark Mariño sa Talisay City Police dihang nahinabi sa Banat News gikan sa eskuwelahan ang biktima ug naglakaw lang paingon sa ilang balay.

Apan kalit lang kining gisugat sa suspek ug giduol dayon gitionan og kutsilyo ang liog niini dayon giguyod paingon sa ngitngit nga habig sa maong lugar dayon mideklarar og         tulis.

Dihang gikuha na unta sa suspek ang gisambilay nga bag sa biktima nga dunay sulod nga mga libro ingon man pitaka ug cellphone niini mikisi-kisi ang biktima ug misukol pinaagi sa pagpatid sa suspek.

Tungod sa kalagot sa suspek gidunggab siya niini makadaghang higayon ug naigo sa nagkadaiyang bahin sa iyang lawas ingon man sa bukton.

Wala pa gyud matagbaw ang suspek nipunit kini og bato dayon gihapak ang ulo sa biktima una pa misibat dala ang bag niini.

Ang biktima gidala sa tambalanan sa mga residente human makapangayo og tabang ug luwas na hinoon sa peligro samtang ang suspek padayun pang gipangita sa kapulisan.