Miriam gidayeg ni Davide III sa balaudnon vs. nipotismo

Nakadayeg si Cebu City Acting Mayor Hilario Davide III kang Senadora Miriam Defensor Santiago tungod sa balaudnon nga gipalabang niini sa Senado.

Ang gipasabot sa acting mayor mao ang Senate Bill 2616 kon ang Anti-Political Recommendation Act sa senadora.

Gidili sa nahisgutang balaudnon ang paghimo og rekomendasyon alang sa appointment, promotion, assignment, transfer o designation sa usa ka kawani ngadto sa laing posisyon.

Lakip nga gidid-an sa proposal ni Santiago mao ang mga sakop mismo sa kongreso, national ug local government official, sakop sa judiciary, opisyal sa political party ug uban pa.

Matud ni Davide nga nindot ang tumong sa balaudnon ni Santiago tungod kay kini mao unya ang makapugong ug magsalikway sa padrino system.

Duna hinuoy pagduda ang acting mayor nga lisod maka-first base o maaprubahan ang proposal sa senadora diha mismo sa senado.

Kini tungod sa pagtoo ni Davide nga daghan ang maligsan niini lakip na ang mga kauban ni Santiago nga mga senador.

“Lisod tingali kaayo nang balaudnona nga maaprubahan kay mao man gud nay buluhaton sa mga politiko, bisan kami diri nga mga konsihal, ang mga tawo moduol man nato mangayo og rekomendasyon, no doubt nga noble kaayo ang purpose ana pero practically every politician is guilty ana kung ma-criminalize nang pag-recommend,” sumala ni Davide.

Ubos sa balaudnon ni Santiago mahimong makamulta og usa ka gatos ka pesos ngadto sa usa ka libo ka pesos ang si bisan kinsa nga makalapas niini.

Gawas sa multa mahimo usab nga mabilanggo ug hangtud sa usa ka tuig ang mga malapason kung mapamatud-an sa hukmanan.

Ang bug-at nga silot ipahamtang ngadto sa public officer kung mapamatud-ang sad-an sa usa ka administrative proceeding.

Kini tungod kay mahimong mataktak sa katungdanan ang malapason bisan kung walay criminal prosecution nga ipahigayon batok niini.