Babayeng sakop sa gang sikop

Usa ka 14-anyos nga batang babaye nga sakop sa gang ang nadakpan sa mga barangay tanod sa barangay Lorega kagahapon sa kaadlawon tungod sa paghupot og armas nga way lisensya pipila ka minutos human sa pinusilay sa grupo sa mga batan-on diha sa may dalan MJ Cuenco sa barangay Tejero.

Si SPO1 Manuel Margallo sa Waterfront Police Station 3 sa Cebu City Police Office nga gikahinabi sa Banat News nagkanayon ang dalagitang taga Villagonzalo II barangay Tejero ning dakbayan gidudahang sakop sa usa sa mga gang nga nagkagubot.

Ang mga tanod sa barangay Lorega nga si Noel Perales ug mga kaubanan nakasakmit og Paltik .38 rebolber uban sa bala nga nag-ungot pa sa tambor niini.

Ang mga tanod nakadawat og alarma gikan sa maong dapit human giingong dunay duha ka grupo sa mga batan-ong nagpinusilay sa maong lugar.

Dihang gipangrekisa ang mga batan-on nakuhaan og armas ang maong dalagita ug gi-turn-over na karon ngadto sa womens desk sa CCPO.

Si Kapitan Fritz Herera sa barangay Lorega nga gikahinabi sa Banat News nagkanayon nga gawas sa dalagita duna pay laing tulo ka mga lalaking apil sa gidakop human gitumbok sa mga residente nga apil sa pinusilay.

Sumala pa niini nga nakasibat na unta ang maong mga babaye human sa duha ka mga buto-buto sa armas apan usa sa mga concerned citizen ang mitug-an kanila nga ang armas gitunol sa usa ka batan-ong lalaki ug gipakuptan sa babaye atol na sa ilang pag-ikyas.

Hinungdan nga dali nilang gigukod diha sa may MJ Cuenco barangay Tejero ug dihang girekisa nakuha ang maong .38 rebolber nga armas nga nagtangag pa sa mga bala.