Early registration sa 1st year himuon

Nagplano karon ang Department of Education (DepEd) pagpahigayon og early registration alang sa incoming first year high school students.

Sa DepEd Order Number 62 nga giluwatan ni Secretary Jesli Lapus, gusto niini nga sa buwan sa Enero sunod tuig sugdan ang early registration.

Tuyo sa kalihim niini nga madeterminar kun kinsa kadtong mga tinun-an sa grade 6 nga hayan dili makapadayon sa high school sa sunod tuig tingtungha.

Ang nahisgutang mga tinun-an mao unya ang target clientele sa Drop Out Reduction Program sa DepEd pinaagi sa Open High School.

Wala hinuon masayod si Officer in Charge sa Cebu City Schools Division Wilfredo Tano labot sa nahisgutang programa.

Apan gihangop ni Tano ang plano ni Lapus pagpahigayon og early registration alang niadtong prospective graduates sa grade 6.

Kini aron kahatagan og taas nga higayon ang DepEd pagpangita og solusyon sa mga problema unya nga motumaw sa sunod tuig ting-tungha.

“Mas maayo kung dunay early registration kay aron mahibaw-an nato kung pila gyud ang posibleng makatungha sa high school,” sumala ni Tano.

“Nindot na nga lakang aron dili ta magdali-dali pagpangita og dugang mga silya, classroom ug uban pa, mapriparahan ba ang gikinahanglan,” dugang pamahayag ni Tano.

Lakip nga ilhon sa DepEd mao kadtong high school age nga wala makapadayon sa pagtungha human makagradwar sa elementarya.

Dili na hinuon bag-o ang early registration sa mga tinun-an tungod kay kini gihimo na sa DepEd alang sa kabataan nga mosulod usab sa grade 1.

Ang nahisgutang lakang maoy kabahin sa tinguha sa DepEd pagpataas sa gidaghanon sa participation rate sa basic education.