Tourist police ipa-umol

Makigtagbo karong buntag ang regional director sa National Police Commission (NAPOLCOM-7) Bernardo Calibo ngadto sa hepe sa kapolisan sa probinsya sa Sugbu Sr. Supt. Carmelo Valmoria alang   sa hingpit nga pag-umol sa Cebu Tourist Police.

Gipasabot ni Calibo sa dihang nahinabi sa Banat News nga kini agi usab pagsanong sa pamahayag ni Tourism Secretary Joseph Ace Durano nga paghimong numero-uno sa Pilipinas isip tourist destination karong tuiga.

Matud ni Calibo napanglantawan nila nga mas modaghan pa ang tourist arrivals dinhi sa nasud karung tuiga ilabina dinhi sa Sugbo hinungdan nga gikinahanglan ang dugang seguridad partikular ang unit nga motutok gyud alang niini.

Matud ni Calibo sentro unya sa ilang pagahisgutan atol sa tigum mao ang pagtuki kabahin sa environmental concern sa mga gitumbok nga tourist area dinhi sa Sugbo, pagsabot sa nagkalain-laing kultura sa mga turista aron malikayan ang kasungian ug ang pagporma og emergency rescue plans aron magamit kung gikinahanglan.

Ang Central Visayas maoy gihimong pilot area sa gitukod nga tourist police ug gani na-umol na ang tourist police sa Bohol niadtong nilabay’ng semana diin niabot og 50 ka mga polis ang napilian.

Dinhi sa dakbayan sa Sugbu dunay gitukod nga Compact Police Station ang labing unang police station sa nasud kansang katuyoan may labot sa mga turista dinhi sa dakbayan diin ang mga polis gitun-an sa pinulungan sa Korea tungod kay kadaghanan sa mga langyaw nga dia dinhi gikan sa maong nasud.

Atol unya sa orientation usa ka German national nga si Holger Horn nga eksperto sa rescue plans maoy magsilbeng mamumulong ug mohatag og mga katin-awan sa katuyoan niini.