Central Visayas 'luwas' sa melamine

Giklaro sa Bureau of Food and Drugs (BFAD-7) nga luwas ang tibuok Central Visayas ilabi na dinhi sa Sugbu gikan sa pipila ka mga food ug milk products nga nasutang positibo sa melamine contamination.

Nasayran nga niadtong Miyerkules mipagawas na usab ang BFAD-Manila og laing hugna sa resulta sa pakisusi niini sa mga food ug dairy products gikan sa nasud sa China ug nasuta nga dunay laing produkto nga positibo sa melamine ug kini mao ang Jolly Cow high calcium milk.

Ang unang duha ka milk products sa China nga positibo sa melamine mao ang Goodfood Yili Fresh Milk ug ang Mengnui drink.

Apan gipadayag ni Monena Coyoca ang food and drugs regulation officer sa BFAD-7 nga nakasiguro sila nga wala makaabot sa kamerkadohan ug katindahanan dinhi sa Sugbu ang maong mga produkto.

Subay usab kini sa ilang gihimong inspeksyon ngadto sa nagkalain-laing establisamento ilabina diha sa dalan Manalili paingon sa Carbon dinhi sa dakbayan nga gikuhaan nila og mga sample sa mga baligya niini nga food ug milk products nga ilang giduso sa ulohang buhatan sa BFAD alang sa contamination test.

Hinuon gitug-an ni Coyoca nga namatikdan nila nga dunay pipila ka tindahan nga namaligya sa Jolly Cow milk dinhi sa Sugbu apan nasuta nila nga low fat kini ug dili high calcium ug ingon man gikan usab kini sa nasud sa New Zealand dili sa China.

Hinuon subling gipasidan-an ni Coyoca ang publiko nga pabiling magmatngon ug dili gihapon mopalit sa mga produktong gatas ug pagkaon gikan sa China samtang wala pa mahingpit ang gipahigayong mga laboratory tests sa mga imported nga produkto.

Giklaro ni Coyoca nga aron makasiguro gitambagan niya ang mga customer nga siguradohon pagtan-aw ang label sa mga produkto niining paliton kun diin nga nasud kini gi-manufacture.