Mga biktima ni Joavan midangop sa DOJ

Ang mag-amahan nga Oscar ug Osbert Abellana nga biktima sa pagpang-harass sa anak sa mayor sa Talisay city midangop sa Department of Justice aron mapa-ubos sa witness protection program tungod sa sunodsunod nga hulga nga nadawat.

Mipirma ang mag-amahan nga Abellana og joint affidavits ug gisukip ang mga blotter nga nagmatuod sa mga hulga nga ilang nadawat una niadtong Oktubre 5 diin lima ka armadong lalaki uban ni Joavan Fernandez, sinagop ni Mayor Socrates Fernandez, ug katapusang panghulga kagahapon sa buntag.

Si Oscar nagkanayon nga napugos sila sa pagduol sa kagamhanan aron mapaubos sila sa witness protection program tungod sa kahadlok nga panimaslan.

Apan si Mayor Fernandez nagkanayon nga dili angayang mabalaka ang pamilyang Abellana tungod kay nabalhog na sa bilanggoan si Joavan.

Si Regional State Prosecutor Graeme June Elmido nagkanayon nga usa ngadto sa duha ka semana una pa mahibaw-an kun tugotan sa Department of Justice ang aplikasyon sa mag-amahan nga Abellana.

Sa susamang kalambuan, ang tag-iya sa vulcanizing shop nga gi-harass ni Joavan mibarog na gyud sa iyang pamahayag nga si Mayor Fernandez mihatag og P10 mil ngadto sa iyang pamilya ug ang gipatrabaho iyang anak ug misaad og scholarship sa anak niini.

Si Mercidita Abellana, iyaan sa mag-agaw nga Winston ug Osbert Abellana nga pulos gipamun-og human gidagit ni Joavan, miangkon kagahapon atubangan sa mga sakop sa media nga si Mayor Fernandez maoy mihatag og P10 mil aron ibayad sa iyang amo sa gigamit pagpalit og tambal alang sa iyang mga pag-umangkon.

Gitug-an usab ni Mercidita nga ang mayor mipasalig kaniya sa paghatag og business permit alang sa iyang vulcanizing shop aron makabalik na kini sa pag-abli niining semanaha.

Ang mag-agaw nga Winston ug Osbert, uban sa laing lima ka tawo giingong gidagit, gipanghulga ug gipamun-og ni Joavan tungod sa kasuko niini nga nawala sa vulcanizing shop ni Mercidita ang iyang ligid nga gipabulkit.

Si Mercidita nagkanayon nga niadtong Oktobre 7 nagsaulog sa ika-18 nga adlaw’ng natawhan iyang anak nga si Bienvenido “Ondong Dako” hinungdan nga karon pang Oktobre 15 pasudlon og trabaho sa Talisay City Hall ubos sa quota sa mayor.

Kahinumduman, si Mercidita misang-at og kasong robbery batok kang Joavan tungod sa pagsakiyo niini sa TV set ug DVD player, apan miatras kini sa kaso.

Apan bisan sa pag-atras ni Mercidita, si Talisay City Prosecutor Marcial Rubia misang-at gyud sa kasong serious illegal detention ngadto sa korte batok kang Joavan tungod sa pagdagit ug pagtanggong sa mag-agaw nga Abellana.

Si Mercidita mitug-an nga ang abogado sa mga Fernandez nga si Atty. George Bragat maoy migama sa affidavit of desistance nga gipapirmahan nila.

Sumala pa niya nga dili unta sila mopirma tungod kay ilang nasabot nga mahimo silang ibali sa pagkiha sa gipamahayag niini sa dokumento, apan tungod sa iyang pagtuo nga malikay sila sa kasamok, ilang gipirmahan ang affidavit of desistance.

Matud pa hinuon ni Mercidita nga gusto na usab niyang magkauli ang maayong kabubut-on sa iyang pamilya ug sa pamilya ni Mayor Fernandez. Giangkon niya nga dugay na silang suod sa pamilya sa mayor ug ang iyang bana paryente sa mayor.

Si Mercidita miingon nga ang bayaw niya nga si Lando Abellana, igsuon ni Oscar nga amahan ni Osbert, maoy nagsilbeng negotiator sa iyang pamilya ug sa pamilya sa mayor.

Apan si Mayor Fernandez nga nahinabi sa Banat News nagkanayon nga si Mercidita maoy miduol kaniya ug nangayo og panabang. Miangkon ang mayor nga iya kining hatagan og business permit alang sa panginabuhian ni Mercidita.

Gihimakak sa mayor nga mihatag siya og P10 mil sa banay’ng Abellana.

“Akong gitamod ang ilang gipanumpaan nga wala sila bayri, wala sila hulgaa ug wala sila hayloa,” matud sa mayor.