Odilao determinado sa "Baroto Regatta"

CEBU - Bisan og dili mahatagan og suporta gikan sa kagamhanan sa dakbayan sa Talisay si kanhi Custom Collector kinsa tsirman sa City Fisheries & Aquatic Resources Management Council (CFARM C) nga si David “Boy Odilao ang determinadong mopadayon sa iyang gipasiugdahang proyekto nga “Baroto Regatta”.

Ang Baroto Regata ang usa ka lumba sa mga baroto nga maggamit lang og layag diin ang tumong niini mao ang pag-aghat sa mga gagmay’ng mananagat kinsa dili makaabot og palit og mga bangka nga dunay motor sa pagpahigayon og panagat pinaagi sa paggamit og layag.

Ang maong proyekto ang gipanglantawan nga makapauswag usab sa turismo sa siyudad ug gilauman nga mapahigayon na kini matag tuig nga usa sa mga kalihokan sa pagsaulog sa pista sa patrona sa siyudad nga si Santa Teresa de Avila.

Gibutyag ni Odilao kagahapon sa buntag ngadto sa mga tigbalita nga ang budget sa maong proyekto nga P203 mil ang giaprobahan na unta sa siyudad niadtong Septiyembre 1, 2008.

 Apan nasagmuyo siya tungod kay gipasa-pasa na siya nga adto papangayoon og pundo sa city sports commission tungod kay usa ka lumba sa baroto ang iyang pasiugdahan.

Ug gikan sa city sports commission gipasa na usab siya ngadto sa tourism council tungod sa rason nga ang maong kalihokan dunay kalabutan sa turismo.

Si Edgar Mabunay, city budget officer ang mibutyag ngadto sa mga tigbalita nga ang budget alang sa maong kalihokan ang wala maapil sa supplemental budget ug nabalaka siya nga makwestiyon na unya hinuon ang siyudad sa Commission on Audit tungod kay walay appropriation alang niini.

   Ang nahisgutang budget ang kuhaan sa mga premyo, tropeyo, pagkaon, giveaways nga grocery items, sa ipanghatag nga special awards, mga t-shirts ug polo shirts ngadto sa mosalmot sa maong lumba.

Si Odilao ang misugyot nga 50 porsiyento lang sa maong budget ang iyang gustong igahin sa siyudad alang sa maong proyekto ug ang CFARM C na ang maningkamot sa laing 50 porsyento.

Ang anak ni Odilao nga si Talisay City Councilor Bernard Odilao mibutyag kagahapon nga P50 mil lang ang gihatag sa siyudad gikan sa discretionary fund ni Mayor Socrates Fernandez.

Si Gobernador Gwendolyn Gacia kinsa usa unya sa pinasidunggang dinapit sa maong kalihokan ug Kongresista Eduardo Gullas ang gipasalamatan sa kanhi Custom Collector tungod sa suporta niining gihatag sa maong proyekto.

Ang kongresista ug ang gobernadora ang misaad nga mohatag og pundo alang sa proyekto dugang ni Odilao.

Ang “Baroto Regatta” ipahigayon karong Domingo Oktobre 12, 2008 diin ang lumba anha magsugod dapit sa Tourist Seaside Hotel sa Barangay Poblacion subay ngadto sa Pungaton Reef liko sa Lagundi Reef ug balik sa Tourist Seaside Hotel ug gilauman nga 50-60 ka baroto ang mosalmot sa lumba. (BANAT NEWS)