CEBU - Usa ka negosyante ang gitulis sa duha ka tawo nga nagsul-ob og maskara didto sa barangay Manatad, lungsod sa Sibonga, Cebu niadtong Martes sa alas 5:30 sa hapon.
Ang biktima mao si Eugenio Rupita, 26, ulitawo, taga Sitio Tangke, Poblacion, Sibonga ug negosyante og buy and sell sa maong lugar.
Si PO2 Ederlino Bacusmo sa Sibonga Police Station mibutyag sa Banat News nga gikan sa barangay Bae ang biktima ug paingon na unta kining mopauli.
Apan paghiabot sa maong lugar nga gibana- banang 12 kilometros pa ang gilay-on gikan sa lungsod gibabagan sa duha ka tawo nga nagmaskara ang agi-anan ug mition dayon sa ilang armas de fuego hinungdan nga napugos ang drayber sa biktima sa pagpahunong sa ilang Isuzu Elf nga gisakyan.
Dihang nihunong na, ang usa sa mga suspek daling miduol sa drayber ug giti-onan sa armas ang ulo niini samtang ang laing suspek mition usab sa biktima nga naglingkod sa front seat dayong deklarar nga tulis.
Matud ni PO2 Bacusmo nga walay nahimo ang biktima gawas sa pagtugyan sa iyang bag nga dunay sulod nga P13 mil nga kuwarta ug gilakip pa sa pagkuha ang iyang bulawan nga singsing.
Dayon, gipalarga na ang sakyanan sa biktima ug yano usab kaayong nanglakaw paingon sa bukid ang mga suspek.
Hinoon niingon si PO2 Bacusmo nga nakahipos na sila karon og lead nga magtumbok sa mga suspek pinaagi sa mga saksi nga ilang nakuha .
Niadtong milabay’ng bulan, ang amahan ni Bise Mayor Nestor Ponce, nga usa usab ka negosyante, gitulis usab ug nakuha-an kini og P200 mil samtang nanimbang siyag kopras didto sa bukirang bahin sa Sibonga. (BANAT NEWS)