Mary Ann welcome sa Lapulapu

CEBU - Walay supak ang mga huwes sa dakbayan sa Lapulapu kung ugaling mamahimong Municipal Trial Court in Cities (MTCC) Judge si Cebu City Assistant City Prosecutor Mary Ann Castro sa maong dakbayan .

 Matud pa sa officer-in-charge (OIC) sa MTCC sa Lapulapu City   Hon. Judge Wilson Ibones nga sibaw na kaayo ang ngalan ni Fiscal Castro nga mohulip sa iyang pwesto isip MTCC Judge ug andam na siya nga mobiya sa maong pwesto kung moabot na ang maong order gikan sa Korte Suprema ug sa Judicial Bar Council (JBC).

 Wala mabalaka si Judge Ibones nga mawagtang siya sa MTCC sa Lapulapu gumikan kay OIC lamang siya sa maong korte isip hulip kang kanhi MTCC Hon. Judge Ester Veloso.

Nasayran gikan ni Ibones nga base sa iyang plantilya ,ang MTC sa lungsod sa Tuburan maoy iyang korte nga giatiman hangtod karon.

 Matud pa niya nga lakip ang tulo ka mga Judges sa Lapulapu RTC walay supak kang Castro nga mohupot sa maong posisyon gumikan kay dako sila og pagsalig sa mga sakop sa JBC nga maoy mihiling sa mga papeles ug kwalipikasyon ni Castro.

 Gani matud pa ni Ibones nga lakip siya sa mga aplikante sa maong posisyon ug gani nagkadungan sila si Castro nga miatubang sa interview nga gihimo sa mga sakop sa JBC niadtong Hulyo 1 didto sa Waterfront Hotel Lahug.

 Miingon si Ibones nga puwerte niyang biliba kang Castro gumikan kay bisan sa nagkadaiyang kontrobersiya nga gikalambigitan niini apan nagpabilin gihapong mibarog sa pag-atubang sa iyang umaabot nga kaugmaon .

Apan si Fiscal Castro nga nahinabi sa Banat News mipadayag nga hangtod ning pagsuwat sa balita wala pa siya makadawat og order ug naghuwat pa siya sa pormal nga kamanduan gikan sa Korte Suprema ug sa JBC nga maoy motudlo kaniyang huwes sa dakbayan sa Lapulapu.  (BANAT NEWS)