Dakay makiglalis sa ubang relihiyon

CEBU - Andam makigdebate ang tigpamaba sa Archdiocese of Cebu nga si Msgr. Achilles Dakay sa ubang religious leader nga mipabor sa Reproductive Health Bill.

Kini human masayod si Dakay nga pipila ka religious group midapig sa pagpalabang sa kontrobersyal nga balaodnon.

Ang Iglesia ni Cristo, Jesus is Lord, ingon man ang ubang mga Protestante lakip na ang pipila ka Muslim leaders gikatahong pabor sa Reproductive Health Bill.

Gitataw ni Dakay nga supak ang Simbahang Katoliko sa maong balaodnon tungod kay kini giingong nahasupak sa pagtulun-an sa Simbahan.

“Dili man gyud na husto kay ang paagi nga gigamit daan na mang sayop, ginaingon man nga the end does not justify the means,” sumala ni Dakay.

Nagkanayon si Dakay nga siya andam makiglantugi sa ubang relihiyon aron malamdagan ang katawhan sa ilang baruganan.

“Wala man tay lalis sa tumong sa balaodnon ba kanindot gud ana, pero ang means lagi husto ba na nga mogamit ta og contraceptive, ang kadaut anang uban kay ang ilang pagtuo sa pagdaghan sa katawhan reproduction man dili man procreation mao nga bisan unsa na lang ang paagi nga ilang nahuna-hunaan,” miingon si Dakay.

Wala mahadlok si Dakay nga dunay mahitabong panag-away sa relihiyon kun kini maoy paagi nga makombinser ang kinabag-an sa posisyon sa Katolikong Simbahan.

“Daan na man tang nag-away ba, ang ato lang nga maklaro ning tanan kay dili makatugot ang Simbahang Katoliko nga mapasar nang maong balaodnon,” matud ni Dakay.

Nasayran nga ang House Bill 5043 kon ang Reproductive Health, Responsible Parenthood and Population Development Act of 2008, aprobado na sa unang pagbasa.

Kini giingong nanginahanglan lang og 120 ka majority votes sa mga kongresista aron mapalabang ang maong balaodnon sa ikaduhang pagbasa sa Ubos Balay Balaoranan.

Malaumon hinuon si Dakay ug ang ubang supak sa House Bill 5043 nga dili molampos ang tinguha sa Pro-Reproductive Health Bill.

Kini tungod kay si Presidente Gloria Macapagal Arroyo mismo gikataho usab nga dili pabor sa nahisgutang balaodnon.  (BANAT NEWS)