Welder natagakan rampa, ulo napiyapi

CEBU - Napiyapi ang ulo sa usa ka welder human madat-ogi sa ramp flap kagahapon sa alas 11:40 sa buntag samtang nag-welding sa side ramp sa MV Filipina Princess nga gipanag-iya sa Sulpicio Lines nga naka-angkurahi diha sa Pier 5 ning dakbayan.

Patay diha-diha gilayon si Norberto Cañas, 42, taga barangay Canbanay dakbayan sa Danao, welder sa R&S Construction Inc. nga gipanag-iya ni Rodrigo Seredrica nga taga dakbayan sa Danao.

Kini human kalit lang naharos ang damba nga puthaw samtang nag-welding si Cañas nga nagpatong niadtong higayona ug sa kakalit sa paglabtik sa ramp flap naigo ang likod nga bahin sa iyang ulo.

Gumikan sa kakusog sa impact ug kabug-at sa pag bounce sa ramp flap didto kini nideretso sa likod sa iyang ulo hinungdan nga maayong pagkapilit sa nawong sa biktima sa ramp ug pagkabuak usab sa welding mask.

Si Cerillo Montoya, project in-charge sa R&S Inc. nga gikahinabi sa mga tigbalita nagkanayon nga aksidente lang gayud ang nahitabo sa ilang sakop nga si Cañas.

Matud pa niini nga duha na ka semana silang mipahigayon sa pag-welding sa nagkadaiyang parte sa maong barko pag-renovate niini human kini gi-grounded.

Gitataw niini nga ang ilang amo mipasalig nga maoy moabaga sa gastuhan sa pagpahiluna sa patay’ng lawas ni Cañas.  (BANAT NEWS)