Expired nga paninda gisakmit gikan sa sidewalk sa Carbon

CEBU - Ubay-ubay nga mga expired grocery items ang gisakmit sa Cebu City Market Operations Division gikan sa mga sidewalk vendors diha sa Carbon area tungod kay nasutang pulos na kini mga expired ug di na luwas kan-on alang sa mga tawo.

Labing minos pito ka mga sidewalk vendors ang nasakmitan og nagkadaiyang baligya nga naglakip sa energy drinks sa mga bata, tea, gatas nga ebaporada ug mga junk foods lakip na mga   margarina.

Lakip sa gisakmit mao ang napulo ka kilong karneng baboy, mga sausages ug mga ginaling nga karne.

Ang operasyon gipanguluhan ni City Market Administrator Racquel Arce human manggawas ang mga report kabahin sa mga barato kaayong mga baligya diha sa maong dapit nga makaduda kung ikumparar sa presyo sa susama gihapong produkto sa ubang tindahan.

Dugang kasayuran ni Arce nga moabot na sa tulo ka tuig ang maong mga vendors nga namaligya diha sa Carbon area.

Subay niini nipahimangno ang City Market Administrator ngadto sa mga konsumidor nga dili magpataka og palit kung kadudahan ang pwesto ug sa kabarato kaayo sa presyo.

“Dili ta mag-apas nga barato atong mapalit, ang atong siguruhon nga maayo pa ba kan-on ang atong gipalit, naa may daghang baligya sud sa atong kamerkaduhan nga makagarantiya ko nga limpyo ug fit for human consumption adto ta didto mopalit, siguro dunay kalainan sa presyo pero garantisado nga dili makadaut sa lawas,” sumala ni Arce.

  Matud ni Arce nga ang kinatibuk-an nilang nasakmit niadtong miaging gabii mobalor kini og dili momenos sa usa ka gatos ka libo ka pesos.

Sumala ni Arce nga ang ilang operasyon gipasubay usab sa ilang pagpang-inspeksyon sa mga baligyang dairy ug milk products tungod sa ‘melamine scare’ sa tibuok kalibutan.

Kini human mapagya ang mga China-made milk products nga dunay sagol nga makadaut nga kemikal nga gitawag og melamine nga sagad gisagol sa mga gatas ug uban pang food products.

Wala hinooy nasikop nga mga manindahay atol sa pagpangsakmit sa mga expired nga mga baligya tungod kay giingong wala nay miangkong tag-iya niini.

Apan nasayran ni Arce nga ang gituuhang namaligya sa nahisgutang mga food products giingong mga molupyo sa dakbayan sa Mandaue.

Sa samang higayon miingon ang City Market Administrator nga iya usab nga pakigtagboan ang mga opisyal sa Cebu City United Vendors Association (CCUVA).

Nagkanayon si Arce nga kung dili makadisiplina ang CCUVA sa ilang mga sakop kini iyang irekomendar ngadto sa mayor nga dili na patindahon sa siyudad.  (BANAT NEWS)