Development cost gipasabot ni Tomas

CEBU - Gipanghimakak ni Mayor Tomas Osmeña nga nausab ang iyang baruganan labot sa pagtugot sa usa ka investor nga makakolekta og development cost.

Kini human mopadayag ang mayor nga siya motugot sa Filinvest pagkolekta niini kun dili unya modaog sa bidding pagpalit og luna diha sa South Road Properties (SRP).

Ang usa sa mga abogado sa Ayala consortium nga si Atty. Aristotle Batuhan nga sakop usab sa oposisyon sa dakbayan maoy mikwestyon sa desisyon ni Osmeña.

Kini tungod kay gisupak sa mayor ang tinguha sa Ayala nga mokolekta og development cost kung mapildi sa price challenge pag-supply niini og tubig sa MCWD.

Kini pinaagi usab sa pagtrabaho sa Carmen Bulk Water project nga nabaraw tungod usab sa hugot nga pagsupak ni Osmeña sa maong proyekto.

Gipadayag ni Batuhan nga makapadismaya sa mga investor ang pag-usab-usab sa polisiya sa mayor ug kini giingong dili maayong indikasyon.

Apan gitataw ni Osmeña nga lahi ug dako ang kalainan sa gipangayo nga development cost sa Ayala tungod kay kini mobalor og kapin sa P100.

“The whole project of Ayala is something like P700 million but they will ask a development cost for P100 million plus, that’s too much,” sumala ni Osmeña.

Giklaro sa mayor nga ang design sa Ayala mao lang ang pagbuhat og usa ka rubber dam nga gihulagway niini nga yano lang himuon.

Midugang ang mayor nga sukwahi sa Ayala, giingong wala gani modemanda og bisan unsang development cost ang Filinvest sa unsolicited proposal niini.

“In the case of Filinvest, they don’t ask for it, because they really want the transaction, they will match any better offer, I’m almost sure,” dugang sa mayor.

Gitataw ni Osmeña nga mahimong dili makakolekta og development cost ang usa ka investor kun dili gamiton ang design niini sa winning bidder.

Ang development cost mao ang gasto sa usa ka investor pagpahigayon og feasibility study, paghimo og design sa usa ka proyekto ug uban pa. (BANAT NEWS)