Polis nga nanion gikiha sa bata

CEBU - Kasong grave threat ang gipasaka sa kapolisan kagahapong adlawa batok ni PO1 Samuel Alvares kinsa nanion og armas sa usa ka menor de edad niadtong Domingo diha sa Freedom Park barangay Ermita ning dakbayan.

Si Cebu City Police Office Chief Sr. Supt. Patrocinio Comendador mitataw nga gipasaka gyud sa iyang mga imbestigador sa Carbon Police Station ang kaso batok ni PO1 Alvarez human si J-Boy Ibañez, 17, wala gyud mosibog sa kaso.

Samtang giklaro usab niini nga sa pagkakaron ila pang gisusi ang kalibre .45 ni PO1 Alvares kini kun aduna ba gayo’y igong mga dokumento sa dihang naaktuhan siya sa mga SWAT nga naghupot niini.

Samtang usa ka sakop sa Carbon Police Station nga nahinabi sa Banat News ug wala magpaila mitataw nga mihangyo ang asawa sa maong polis ngadto sa minor de edad ug sa uyoan niini apan gibalibaran kini.

Si PO1 Alvarez sakop kini sa Special Reaction Unit (SRU) sa Cebu Provincial Police Office (CPPO) isip VIP escort ni Capitol consultant on security Byron Garcia.

Nasayran nga niadtong Domingo sa buntag nakatulog si PO1 Alvares sa Carbon Police Station human madakpi sa SWAT dihang nanion sa usa ka minor de edad gumikan sa kahubog. (BANAT NEWS)