Wala maalarma si Konsehal Christopher Alix sa gipamaligyang mga cosmetics nga gidudahang gisagulan usab og mga toxic chemicals.
Matud sa konsehal nga ang labaw niyang gikabalak-an mao ang baligyang mga pagkaon nga gisagulan og kemical nga makadaot sa panglawas sa tawo.
Labing minos tulo ka kongresista ang mipadayag karon sa ilang kabalaka nga dunay sagol nga toxic chemicals ang gipamaligyang mga cosmetic products dinhi sa nasud.
Sila si Kongresista Luis Villafuerte, Martin Romualdez ug Aurelio Gonzales miduso pa og joint resolution ngadto sa Ubos Balay Balaoranan labot niini. aron ipasusi sa kongreso kun ang mga cosmetic company sa nasod migamit ba og makadaut nga kemical sa ilang mga produkto.
Gibasehan sa mga magbabalaud sa ilang kabalaka mao ang usa ka pagtuon sa U.S. National Institute of Occupational Safety and Health nga nagpakita nga dul-an sa 900 ka kemikal nga gigamit sa cosmetics makadaot sa tawo ug gikabalak-ang adunay deadly side-effects.
Kini sama sa skin cancer, skin allergies, asthma, hormonal problems, reproductive disorders, ug labaw sa tanan, giingong makadaot sa fetus.
Naalarma ang nahisgutang mga kongresista niini tungod kay ang Bureau of Food and Drugs (BFAD) dili mo-require sa mga kompanya og mandatory testing sa ilang produkto.
Apan matud ni Alix nga mas dako og epekto sa negosyo sa mga cosmetic company sa nasud kun ang ilang baligya makadaut sa ilang mga kostomer.
“Kinsa may mamalit na anang ilang produkto kung makadaot sa ilang mga kustomer, mga babaye baya ang sagad mopalit ana, sensitive og skin,” sumala ni Alix.
Ang konsehal nga maoy chairman sa Committee on Health sa City Council dili hinoon supak kung dunay himoon nga “precautionary measure” ang gobiyerno niini.
Apan alang kang Alix nga siya mas maalarma kun ang hisgutan mao na ang pagkaon nga gisagulan og makadaot nga kemikal sama sa melamine.
“Basta dili lang kan-on, dili lang tunlon, dili kaayo ko mabalaka ana kay mahimo man ug dili na mogamit ang cosmetic user kun duna silay mabatyagan,” sumala sa konsehal.