Gihasi ni Joavan gipaabot nga mokiha

CEBU – Kanhi kawani sa motor pool kinsa giingong giselosan sa anak sa mayor sa dakbayan sa Talisay nga si Joavan Fernandez ang gipaabot sa kapolisan nga moduso og pormal nga reklamo aron mapasakaan og kaso si Joavan.

Kahinumduman nga si Kashmir dela Cuesta kinsa kanhi kuyog-kuyog ni Joavan ang giitsahan og bala, hapit paligsi sa pajero ug gisukmag sa anak sa mayor tungod sa selos.

Ang Banat News ang mitawag sa cellular phone ni dela Cuesta kagahapon sa hapon aron makuhaan kini og pamahayag kung moduso ba kini og kaso batok kang Joavan apan ang anak niining si Vincent ang nakatubag ug nagkanayon nga wala ang iyang amahan ug ang maong cellphone iyaha ug dili sa iyang amahan.

Ang officer in charge sa Talisay City Police Station nga si Senior Inspector Jovito Canlapan sa pakighinabi niini sa Banat News kagahapon sa hapon nagkanayon nga ang maong insidente nahitabo niadtong Biyernes sa hapon apan ang biktima niadtong Sabado lang mianha sa ilang buhatan aron magpa-blotter.

Matud niini nga gihuwat nila si dela Cuesta nga mobalik sa ilang buhatan aron moduso og kaso batok sa anak sa mayor.

Niadtong Biyernes wala dayon pabiyaa diha sa motorpool ni Canlapan ang mga polis nga mialarma aron kung mobalik si Joavan ug ugaling makitang magdala og armas masikop dayon kini apan ang anak sa mayor ang wala na mobalik ug gani nakabiya na kini sa pag-abot sa mga polis nga mi-alarma.

Kahinumduman nga ubay-ubay na usab nga mga insidente ang gikatahong nalambigitan sa anak sa mayor apan kasagaran sa mga biktima ang dili mopasaka og kaso ug kung aduna may mopasaka og kaso moatras ra usab ang uban kanila. – BANAT NEWS