CEBU – Tulo ka tawo usa niini menor de edad ang nalandig sa tambalanan human nabiktima sa pagpamusil kagahapon sa kadlawon sa tulo ka lalaki kinsa pulos nagsakay og motorsiklo diha sitio Litmon ug Miramar, barangay Poblacion, dakbayan sa Talisay.
Ang mga biktima mao sila si Ricky Mateo, 20-anyos, Ian Cabahug, 20, parehong mga residente sa sitio Litmon ug Mont Gumere Bacatigue, 17, taga sitio Miramar.
Ang mga suspetsado kinsa daling nagpasutoy sa motorsiklo nga ilang gipangsakyan human sa hitabo giila sa mga nakasaksi nga sila si Glenn del Rosario, Gerald Tradio ug Raymund Sayson mga residente sa barangay Cansojong sa maong siyudad.
Base sa imbestigasyon sa kapolisan nga si Mateo ug Cabahug kinsa adunay laing mga kauban ang naglakaw paingon nang mopauli apan kalit lang nga mitungha ang nahisgutang mga suspetsado kinsa parehong nagsakay og motorsiklo ug gipamusil ang mga biktima.
Si Mateo ang nakaangkon og samad pinusilan sa walang pulso diin ang bala milahos sa iyang siko samtang si Cabahug ang nakaangkon usab og samad pinusilan sa ibabaw'ng bahin sa iyang buko-buko.
Pila ka minuto ang milabay ang maong tulo ka mga lalaki ang miagi diha sa sitio Miramar ug namusil na usab kini kinsa si Bacatigue ang maayong pagka-igo sa tuong abaga.
Ang tulo daling gidala sa Talisay City District Hospital sa mga miresponding polis.
Ang kapolisan ang napakyas sa pagsikop sa tulo ka suspetsado sa ilang gipahigayong manhunt operation. – BANAT NEWS