Polisiya ni Tomas gisaway

CEBU – Gisaway sa usa ka lider sa oposisyon sa siyudad sa Sugbu, Attorney Aristotle Batuhan, ang pagpatuman og polisiya sa kagamhanan sa dakbayan.

Kini may kalabutan sa pagtandi ni Batuhan sa duha ka proyekto, ang Carmen Bulk Water project ug ang gipaabot nga pagsulod sa Filinvest diha sa South Road Properties (SRP).

Wala makauyon ang abogado sa pagsaway ni Mayor Tomas Osmeña sa usa ka consortium nga gusto unta ang motrabaho sa Carmen water project.

Ang nahisgutang consortium nga mihimo og unsolicited proposal giingong mangayo og development cost kun mapildi sa ipahigayong price challenge o competitive bidding.

Apan gisalikway sa MCWD ang proposal bisan pa man sa pag-uyon niini pagkolekta og development cost tungod usab sa pagsupak ni Osmeña.

Apan sa habig sa Filinvest kun kini mapildi sa price challenge giingong tugotan sa mayor nga mokolekta ang maong kompanya og development cost.

Gipadayag ni Batuhan nga ang development cost angayan lang nga itugot ngadto sa usa ka kompanya nga mohatag og unsolicited proposal.

Kini tungod kay ang kompanya migasto usab alang sa ilang gihimo nga pagtuon sama sa feasibility study ug uban pa alang sa proposal niini.

Apan sa dihang ang usa ka consortium nga mangayo og development cost alang sa nabaraw nga Carmen Bulk Water project, kini giingon ni Osmeña nga wala kinahanglana.

Butang nga gikabalaka ni Batuhan tungod sa iyang naobserbahan nga dili consistent ang City government sa polisiya niini.

“Nahadlok ko kay dili consistent ang siyudad in applying policy, unsa may kalainan sa usa ka consortium ug Filinvest nga both unsolicited proposal man,” sumala ni Batuhan.

Nagduda ang abogado nga desperado na ang kagamhanan sa dakbayan pagbaligya sa SRP hinungdan nga kini mibaliwala na sa polisiya niini.

“What is the reason for this, is it because the city is desperate to sell land that it is now going against the very rule they have said?” nangutana si Batuhan.

“They have to be forthright with that because it is not encouraging investors to come to Cebu to invest if they will not consistent in applying rules,” dugang sa abogado. – BANAT NEWS